മലപ്പുറം: മഞ്ചേരിയില് എംപോക്സ് രോഗ ലക്ഷണങ്ങളോടെ യുവാവിനെ മഞ്ചേരി മെഡിക്കല് കോളേജിൽ പ്രവേശിപ്പിച്ചു. ദുബായിൽ നിന്ന് ഒരാഴ്ച മുമ്പ് നാട്ടിലെത്തിയ എടവണ്ണ സ്വദേശിയായ 38കാരനെയാണ് ആശുപത്രിയിൽ പ്രവേശിപ്പിച്ചത്. ഇയാളുടെ സ്രവ സാംപിള് കോഴിക്കോട് മെഡിക്കല് കോളേജ് വൈറോളജി ലാബിലേക്ക് അയച്ചിരിക്കുകയാണ്. നിലവിൽ ഇയാൾ നിരീക്ഷണത്തില് തുടരുകയാണ്.
കഴിഞ്ഞ തിങ്കളാഴ്ച രാവിലയോടെയായിരുന്നു ഇയാൾ ആശുപത്രിയിലെ ത്വക് രോഗ വിഭാഗദം ഒപിയിൽ ചികിത്സ തേടിയത്. എന്നാൽ പനിയും തൊലിപ്പുറത്ത് ചിക്കൻ പോക്സിന് സമാനമായ തടിപ്പുകളും കണ്ടതിനെ തുടർന്ന് വിദഗ്ധ ചികിത്സയ്ക്കു വിധേയമാക്കുകയായിരുന്നു.
എംപോക്സാണെന്ന സംശയത്തിന്റെ അടിസ്ഥാനത്തിലാണ് മുൻകരുതലെന്നും പരിശോധന ഫലത്തിനായി കാത്തിരിക്കുകയാണെന്നും നിലവില് ആശങ്ക വേണ്ടെന്നും അധികൃതര് അറിയിച്ചു. വിദേശത്ത് നിന്നും എത്തിയ ഇദ്ദേഹം വീട്ടിൽ വേ റെ മു റിയിലായിരുന്നു കഴിഞ്ഞിരുന്നത്. സംശയം ഉണ്ടായിരുന്നതുകൊണ്ട് അതിനുള്ള മുൻ കരുതലുകളും ഇദ്ദേഹം എടുത്തിട്ടുണ്ടായിരുന്നുവെന്ന് ആരോഗ്യമന്ത്രി വീണ ജോർജ് പറഞ്ഞു.
രാജ്യത്ത് ആദ്യമായി എംപോക്സ് സ്ഥിരീകരിച്ചെങ്കിലും ഇതാദ്യമായാണ് കേരളത്തില് ഒരാളെ രോഗ ലക്ഷണങ്ങളോടെ നിരീക്ഷണത്തിലാക്കുന്നത്.
