വാഷിങ്ടണ്‍: ഒരു ഛിന്നഗ്രഹം കൂടി ഭൂമിയെ ലക്ഷ്യമാക്കിയുള്ള യാത്രയിലെന്ന് ശാസ്ത്രലോകം കണ്ടെത്തി. ശൂന്യതയിലൂടെയുള്ള സഞ്ചാരത്തിനിടെ ഈ ഛിന്നഗ്രഹം താല്‍കാലികമായി ചന്ദ്രനെ പോലെ ഭൂമിയെ ചുറ്റുന്ന ഒരു ഉപഗ്രഹമായി മാറുമെന്നതാണ് സവിശേഷത. അടിത്തിടെയാണ് 2024 ഒഎന്‍ എന്ന് പേരുള്ള ഛിന്നഗ്രഹം ഭൂമിയെ കടന്ന് പോയത്.
സഞ്ചാരത്തിനിടെ ഭൂമിയുടെ ആകര്‍ഷണ വലയത്തിലകപ്പെടുന്നതിനാലാണ് 2024 പിടി5 എന്ന ഛിന്നഗ്രഹം ഭൂമിയെ ചുറ്റുന്ന ഒരു ഭ്രമണ പഥത്തിലേക്ക് മാറുന്നത്. ഭൂമിയെ ഒരുതവണ ചുറ്റിയ ശേഷം വഴിമാറി സഞ്ചാരം തുടരും.
ഛിന്നഗ്രഹം ഭൂമിയുടെ ഗുരുത്വാകര്‍ഷണ ശക്തിയില്‍ ആകര്‍ഷിക്കപ്പെടുന്നത് അപൂര്‍വമാണ്. സാധാരണ ഛിന്നഗ്രഹങ്ങള്‍ ആകര്‍ഷണ വലയത്തില്‍ അകപ്പെടാതെ തെന്നിമാറും. അന്തരീക്ഷത്തിലേക്ക് പ്രവേശിച്ചാല്‍ത്തന്നെ കത്തിയമമരും. ഭൂമിയുടെ ആകര്‍ഷണവലയം കടന്ന് പോവാനാകാത്ത ഛിന്നഗ്രഹത്തെ മിനി മൂണ്‍ എന്നാണ് വിളിക്കുക. ഇതിനെ കാണാന്‍ പ്രത്യേക ദൂരദര്‍ശിനികള്‍ ഉപയോഗിക്കേണ്ടിവരും. 2024 പിടി5 56 ദിവസം മാത്രമേ ഭൂമിയെ ചുറ്റുന്ന ഭ്രമണപഥത്തില്‍ സഞ്ചരിക്കൂ. ഈ മാസം 29 മുതല്‍ നവംബര്‍ 25 വരെ 2024 പിടി5 ഭൂമിയെ ചുറ്റും. പിന്നീടം സൂര്യനെ ചുറ്റുന്ന ഭ്രമണപഥത്തിലേക്ക് തിരിച്ച് പോവും.
ആസ്റ്ററോയിഡ് ടെറസ്ട്രിയല്‍-ഇംപാക്ട് ലാസ്റ്റ് അലേര്‍ട്ട് സിസ്റ്റം ഉപയോഗിച്ച് കഴിഞ്ഞ മാസം ഏഴിനാണ് 2024 പിടി5 നെ കണ്ടെത്തിയത്.
പ്രതികരിക്കാൻ ഇവിടെ എഴുതുക: