ബെംഗളൂരു : ഗൂഗിൾ പേ, ഫോൺ പേ തുടങ്ങിയ ആപ്ലിക്കേഷനുകളിലൂടെ പുതിയ തരത്തിലുള്ള തട്ടിപ്പുകൾ നടക്കുന്നുണ്ടെന്നും അതീവ ജാഗ്രത പാലിക്കണമെന്നും സൈബർ ക്രൈം പോലീസിന്റെ മുന്നറിയിപ്പ് . പരിചയമില്ലാത്ത ആരെങ്കിലും ഗൂഗിൾ പേ ഉൾപ്പെടെയുള്ള യുപിഐ ആപ്പുകളിൽ ഇതുപോലെ പണം അയയ്‌ക്കുകയും അത് തിരികെ അയക്കാൻ ആവശ്യപ്പെടുകയും ചെയ്താൽ ഉടൻ പണം അയക്കരുതെന്നാണ് പോലീസ് നിർദേശം.
‘ മുമ്പ് പരിചയമില്ലാത്ത ഒരാൾ ഗൂഗിൾ പേ, ഫോൺ പേ, യുപിഐ ആപ്പുകൾ വഴി നിങ്ങൾക്ക് പണം അയയ്‌ക്കുന്നു, തുടർന്ന് പണം നിങ്ങളുടെ ബാങ്ക് അക്കൗണ്ടിൽ എത്തിയതിന് ശേഷം, ആ വ്യക്തി നിങ്ങളെ വിളിക്കുന്നു . അവർ പണം മറ്റൊരാൾക്ക് അയയ്‌ക്കുന്നതിന് പകരം നിങ്ങൾക്ക് തെറ്റായി അയച്ചുവെന്ന് പറയും. കൂടാതെ, അബദ്ധത്തിൽ അയച്ച പണം അതേ നമ്പറിലേക്ക് വീണ്ടും അയയ്‌ക്കാനും ആവശ്യപ്പെടുന്നു. നിങ്ങൾ പണം മടക്കി അയച്ചാൽ അവർ നിങ്ങളുടെ ബാങ്ക് അക്കൗണ്ട് ഹാക്ക് ചെയ്യും. ബാങ്ക് അക്കൗണ്ടിലെ മുഴുവൻ പണവും കൊള്ളയടിക്കപ്പെടും.‘ എന്നാണ് പോലീസ് മുന്നറിയിപ്പ് നൽകുന്നത് .
അങ്ങനെയുള്ള സാഹചര്യങ്ങളിൽ പണം അയച്ച ആളിനോട് അവരുടെ തിരിച്ചറിയൽ രേഖയുമായി അടുത്തുള്ള പോലീസ് സ്റ്റേഷനിൽ വന്ന് പണം കൈപ്പറ്റാൻ ആവശ്യപ്പെടുക, ആരെങ്കിലും നിങ്ങൾക്ക് ഗൂഗിൾ പേയിൽ പണം അയയ്‌ക്കുകയും അത് തിരികെ അയയ്‌ക്കാൻ ടെക്‌സ്‌റ്റ് മെസേജിൽ ലിങ്ക് അയയ്‌ക്കുകയും ചെയ്താൽ, അതിൽ ക്ലിക്ക് ചെയ്യരുത്. ഇത് നിങ്ങളുടെ ബാങ്ക് അക്കൗണ്ട് ഹാക്ക് ചെയ്യാനുള്ള ലിങ്ക് ആകാം എന്നും പോലീസ് പറയുന്നു.
പ്രതികരിക്കാൻ ഇവിടെ എഴുതുക: