ചേര്ത്തല: എസ്എന്ഡിപി യോഗം ജനറല് സെക്രട്ടറി വെളളാപ്പളളി നടേശന് 88-ാം പിറന്നാള് ദിനത്തില് ആശംസാ പ്രവാഹം. മന്ത്രിമാര്, എംഎല്എമാര്, പൊതുപ്രവര്ത്തകര് എന്നിവരടക്കം ഫോണിലൂടെയും നേരിട്ടും ആശംസകള് നേര്ന്നു.
സംസ്ഥാനത്തിന്റെ വിവിധ ഭാഗങ്ങളില് നിന്നുളള യോഗം, എസ്എന് ട്രസ്റ്റ് നേതാക്കളും പിറന്നാള് ആശംസകളുമായി വെള്ളാപ്പള്ളിയുടെ കണിച്ചുകുളങ്ങരയിലെ വസതിയിലെത്തി. പിറന്നാളിനോടനുബന്ധിച്ച് മൂന്നു ദിവസമായി വെള്ളാപ്പള്ളിയുടെ വസതിയില് നടന്ന പ്രത്യേക പൂജകള് ഇന്നലെ ഉച്ചയോടെ സമാപിച്ചു.
ലളിതമായി നടന്ന ചടങ്ങില് വെള്ളാപ്പള്ളി പിറന്നാള് കേക്ക് മുറിച്ചു. ഭാര്യ പ്രീതി നടേശന്, മകന് തുഷാര് വെളളാപ്പളളി, മകള് വന്ദന, മരുമക്കളായ ശ്രീകുമാര്, ആശാ തുഷാര് തുടങ്ങിയ കുടുംബാംഗങ്ങളും യോഗം, ട്രസ്റ്റ് നേതാക്കളും പങ്കെടുത്തു. പിറന്നാള് സദ്യയുമൊരുക്കിയിരുന്നു. ആരേയും പ്രത്യേകം ക്ഷണിച്ചിരുന്നില്ല. 26 വര്ഷത്തിലധികമായുള്ള പതിവു തെറ്റിക്കാതെ, പൊയ്യ എച്ച്പികെ ബിഎഡ് കോളജ് ഡയറക്ടര് പി.ജെ. മാത്യു ഇത്തവണയും പിറന്നാള് കേക്കുമായി എത്തി. വെള്ളാപ്പള്ളി 60 വര്ഷത്തിലധികമായി പ്രസിഡന്റായി തുടരുന്ന കണിച്ചുകുളങ്ങര ദേവീക്ഷേത്രത്തില് പ്രത്യേക വഴിപാടുകള് നടത്തി. ചുറ്റുവിളക്കും തെളിയിച്ചു.
