തിരുവനന്തപുരം: സംസ്ഥാനത്ത് ഇനിയും തീര്പ്പാക്കാനുള്ളത് 40,000ത്തോളം പട്ടയ കേസുകള്. പഴയകാലത്ത് നിയമപരമായ അറിവില്ലായ്മ കൊണ്ടോ, വ്യവഹാരങ്ങളിലെ താല്പര്യക്കുറവുകൊണ്ടോ ആണ് പലതും തീര്പ്പാകാതെ കിടക്കുന്നത്. കേസുകളുടെ തല്സ്ഥിതി പരിശോധിക്കണം. ഇതിനായി എല്ആര് ഡെപ്യൂട്ടി കളക്ടര്മാര്, എല്ടി തഹസില്ദാര്മാര് എന്നിവരുടെ യോഗം ചേരാന് റവന്യു മന്ത്രി കെ രാജന് ജില്ലാ കളക്ടര്മാരോട് നിര്ദ്ദേശിച്ചു.
പട്ടയ അപേക്ഷകളില് ഒഴിവാക്കപ്പെട്ട ആളുകളില് അര്ഹരായവര് ഉണ്ടോ എന്ന പരിശോധനകള് നടത്താനും മന്ത്രി നിര്ദ്ദേശിച്ചു. ഭൂമി പതിച്ചുനല്കുന്നതിലേക്കായി തനത് ഭൂമി, സംരക്ഷിത ഭൂമി എന്നിവയുടെ അധികാര കൈമാറ്റത്തിന് തദ്ദേശ സ്വയംഭരണ വകുപ്പിന്റെ ഉറപ്പ് ലഭ്യമായിട്ടുണ്ട്. ഇവയില് തുടര് നടപടികളുണ്ടാകും. ജില്ലകളില് ലഭിച്ച അപേക്ഷകള് പരിശോധിച്ച് തയ്യാറാക്കിയ പട്ടികയില് ഉള്പ്പെട്ടവര്ക്കുള്ള പട്ടയങ്ങളുടെ വിതരണം സര്ക്കാരിന്റെ നൂറുദിന പരിപാടിയില് ഉള്പ്പെടുത്തി നടത്തും.
ഭൂമി തരംമാറ്റം സംബന്ധിച്ച നടപടികളില് ഏജന്റുമാരുടെ ഇടപെടലുകളില്ലാതിരിക്കാന് ജാഗ്രത വേണമെന്ന് മന്ത്രി നിര്ദ്ദേശിച്ചു. രണ്ടാഴ്ചയിലൊരിക്കല് ഭൂമി തരംമാറ്റം ചുമതലയുള്ള ഡെപ്യൂട്ടി കളക്ടര്മാരുടെ അവലോകന യോഗം ചേരണം.
