മുംബയ് : ടീം ഇന്ത്യയുടെ വനിതാ ലോകകപ്പ് ടീമില്‍ ഇടം പിടിച്ച് വയനാട്ടുകാരി സജന സജീവനും തിരുവനന്തപുരം സ്വദേശി ആശ ശോഭനയും. ലോകകപ്പ് ടീമില്‍ ഇടം നേടുന്ന ആദ്യ മലയാളി വനിതകളെന്ന ചരിത്രനേട്ടം ഇതോടെ ഇരുവര്‍ക്കും സ്വന്തമായി.
ലോകകപ്പ് ടീമിലേക്ക് തെരഞ്ഞെടുക്കപ്പെട്ടതില്‍ വളരെ സന്തോഷമെന്ന് ആശ ശോഭന പ്രതികരിച്ചു. കൂടെ മലയാളി താരമായ സജ്നയുമുണ്ടായതില്‍ ഏറെ സന്തോഷം. എല്ലാവരുടെയും പ്രാര്‍ത്ഥന വേണമെന്നും ലോകകപ്പില്‍ ഇന്ത്യയുടെ വിജയമാണ് ഏറ്റവും വലിയ സ്വപ്നമെന്നും ആശ പറഞ്ഞു.
ഹര്‍മന്‍പ്രീത് കൗര്‍ ആണ് ടീമിനെ നയിക്കുന്നത്. ടീമിന്റെ വൈസ് ക്യാപ്റ്റന്‍ സ്മൃതി മന്ഥനയാണ്. ഷെഫാലി വര്‍മ്മ, ദീപ്തി ശര്‍മ, ജെമീമ റൊഡ്രീഗ്സ്, റിച്ച ഘോഷ്, യസ്തിക ഭാട്ടിയ, പൂജ വസ്ത്രാക്കര്‍, രേണുക സിംഗ് താക്കൂര്‍, അരുന്ധതി റെഡ്ഢി, ദയാലന്‍ ഹേമലത,രാധാ യാദവ്, ശേയങ്ക പാട്ടീല്‍ എന്നിവരാണ് ടീമിലെ മറ്റംഗങ്ങള്‍.
ഒക്ടോബര്‍ മൂന്ന് മുതല്‍ യുഎഇയിലാണ് ലോകകപ്പ്. ഇന്ത്യയുടെ ആദ്യ മത്സരം നാലിന് ന്യൂസിലന്‍ഡിന് എതിരെയാണ്. ആറിന് പാകിസ്ഥാനെയും ഒന്‍പതിന് ശ്രീലങ്കയേയും പതിമൂന്നിന് നിലവിലെ ചാമ്പ്യന്‍മാരായ ഓസ്ട്രേലിയയേയും നേരിടും. ബംഗ്ലാദേശിലെ സുരക്ഷാ പ്രശ്നങ്ങള്‍ മൂലമാണ് ടൂര്‍ണമെന്റ് യുഎഇയിലേക്ക് മാറ്റിയത്.
പ്രതികരിക്കാൻ ഇവിടെ എഴുതുക: