ആലപ്പുഴ: ശിശു ക്ഷേമ സമിതിയുടെ കഞ്ഞിക്കുഴി ചില്ഡ്രന്സ് ഹോമില് നിന്നും 3 ആണ്കുട്ടികളെ കാണാതായി. 15,14 എന്നീ വയസ്സുകളിലുള്ള കുട്ടികളെയാണ് കാണാതായത്. കഞ്ഞിക്കുഴിയിലെ ഹോപ്പ് എന്ന ചില്ഡ്രന്സ് ഹോമിലെ കുട്ടികളെ ഇന്നലെ വൈകുന്നേരം മുതലാണ് കാണാതായത്. സംഭവത്തില് മാരാരിക്കുളം പൊലീസ് അന്വേഷണം ആരംഭിച്ചു.
ഇന്നലെ അവധി ദിവസമായതിനാല് കുട്ടികള് പുറത്തുപോയതായിരുന്നു. എന്നാല് വൈകുന്നേരം കുട്ടികള് തിരിച്ചുവന്നില്ല. ഈ സാഹചര്യത്തിലാണ് കുട്ടികളെ കാണാനില്ലെന്ന് അധികൃതര് പരാതി നല്കിയത്. പരാതിയുടെ അടിസ്ഥാനത്തില് പൊലീസ് അന്വേഷണം ആരംഭിച്ചു. ബസ് സ്റ്റാന്റുകളിലും നഗരത്തിന്റെ വിവിധയിടങ്ങളിലുമാണ് പരിശോധന. മറ്റു പൊലീസ് സ്റ്റേഷനുകളിലും വിവരം അറിയിച്ചിട്ടുണ്ട്.
