അലബാമ: ഭാരത വംശജനായ ഡോക്ടര്‍ യുഎസില്‍ വെടിയേറ്റു മരിച്ചു. അലബാമ ടസ്‌കലൂസയിലാണ് ഡോ. രമേഷ് ബാബു പെരംസെട്ടി (63) വെടിയേറ്റു മരിച്ചത്. വെള്ളിയാഴ്ചയാണ് സംഭവം. ആന്ധ്രാപ്രദേശ് തിരുപ്പതി ജില്ല സ്വദേശിയാണ് രമേഷ് ബാബു. ഇയാള്‍ വിവിധ ആശുപത്രികളില്‍ ഫിസിഷ്യനായി ജോലി ചെയ്തുവരികയായിരുന്നു.
കൊലപാതകികളെ കുറിച്ച് വ്യക്തമല്ല. ഇതുസംബന്ധിച്ച് അന്വേഷണം നടന്നുവരികയാണ്. ശ്രീവെങ്കിടേശ്വര മെഡി. കോളജ്, വിസ്‌കോന്‍സെന്‍ മെഡി. കോളജ് എന്നിവിടങ്ങളില്‍ നിന്ന് വിദ്യാഭ്യാസം പൂര്‍ത്തിയാക്കിയ രമേഷ് ബാബു 38 വര്‍ഷമായി ഡോക്ടറായി പ്രാക്ടീസ് ചെയ്തുവരികയാണ്. എമര്‍ജന്‍സി മെഡിസിന്‍, ഫാമിലി മെഡിസിന്‍ എന്നിവയില്‍ ഇദ്ദേഹം വൈദഗ്ധ്യം നേടിയിട്ടുണ്ട്. അലബാമയിലെ പ്രമുഖ ഡോക്ടര്‍മാരിലൊരാളാണ് രമേഷ് ബാബു. വൈദ്യശാസ്ത്ര രംഗത്തെ സംഭാവനകള്‍ പരിഗണിച്ച് ടസ്‌കലൂസയിലെ ഒരു തെരുവിന് അദ്ദേഹത്തിന്റെ പേരും നല്കിയിട്ടുണ്ട്. ഭാര്യയും രണ്ട് ആണ്‍മക്കളും രണ്ട് പെണ്‍മക്കളുമുണ്ട്. യുഎസില്‍ സ്ഥിരതാമസമാണിവര്‍.
പ്രതികരിക്കാൻ ഇവിടെ എഴുതുക: