ഭോപ്പാല്: വയനാട് ഉരുള്പൊട്ടലില് വന് നാശമുണ്ടായ പശ്ചാത്തലത്തില് കേരളത്തിന് 20 കോടി രൂപ ധനസഹായം നല്കുമെന്ന് മധ്യപ്രദേശ് മുഖ്യമന്ത്രി ഡോ. മോഹന് യാദവ് പ്രഖ്യാപിച്ചു . പ്രളയം ബാധിച്ച ത്രിപുരയ്ക്കും 20 കോടി രൂപ പ്രഖ്യാപിച്ചിട്ടുണ്ട്. മധ്യപ്രദേശ് ഉള്പ്പടെയുള്ള ചില സംസ്ഥാനങ്ങളില് ശക്തമായ മഴ, മണ്ണിടിച്ചില്, വെള്ളപ്പൊക്കം തുടങ്ങിയ പ്രകൃതിദുരന്തങ്ങള് ബാധിക്കാറുണ്ടെന്നും ഏതാനും ദിവസങ്ങള്ക്ക് മുന്പ് ത്രിപുരയും കേരളവും ഇത്തരത്തിലുള്ള രൂക്ഷമായ പ്രകൃതിക്ഷോഭങ്ങള് അഭിമുഖീകരിച്ചുവെന്നും മോഹന് യാദവ് എക്സില് കുറിച്ചു. ജീവനും സ്വത്തിനും വന് തോതില് നാശനഷ്ടമുണ്ടായെന്നത് വളരെ ദുഃഖകരമാണ്. ശ്രീകൃഷ്ണ ജന്മാഷ്ടമിയുടെ ഈ ദിനത്തില് രണ്ടും സംസ്ഥാനങ്ങള്ക്ക് ആശ്വാസ ധനം പ്രഖ്യാപിക്കുകയാണെന്ന മുഖ്യമന്ത്രി പറഞ്ഞു.
ഇരു സംസ്ഥാനങ്ങളും പ്രതിസന്ധിയില് നിന്ന് എത്രയും വേഗം കരകയറട്ടെയെന്ന് പ്രാര്ത്ഥിക്കുന്നതായും മോഹന് യാദവ് എക്സിലൂടെ അറിയിച്ചു.
