പെരുമ്പാവൂർ : റെയിൽവേയിൽ ജോലി വാഗ്ദാനം ചെയ്ത് പണം തട്ടിയ സംഭവത്തിനു ഒരാൾ അറസ്റ്റിൽ. തിരുവനന്തപുരം വെങ്ങാനൂർ മംഗലത്ത് കോണം എസ്.കെ ഭവനിൽ സന്തോഷ് കുമാർ (51)നെയാണ് തടിയിട്ട പറമ്പ് പോലീസ് അറസ്റ്റ് ചെയ്തത്. സംഭവവുമായി ബന്ധപ്പെട്ട് ഇടത്തല വടക്കേപ്പുറം സഞ്ജു (44), കീഴ്മാട് മOത്തിലകം ഷിനിൽ (42) എന്നിവരെ നേരത്തെ അറസ്റ്റ് ചെയ്തിരുന്നു.
പുക്കാട്ട്പടി സ്വദേശി സജീറിന് റെയിൽവേയിൽ അറ്റൻ്റർ ജോലി വാഗ്ദാനം ചെയ്ത് അഞ്ച് ലക്ഷം രൂപ തട്ടിയെടുക്കുകയായിരുന്നു. മൂന്നു പ്രാവശ്യമായി തുക കൈപ്പറ്റിയ ശേഷം വ്യാജലെറ്റർ ഹെഢിൽ റയിൽവേയുടെ അങ്കമാലി ഓഫീസിൽ ജോലിക്ക് നിയമിച്ചുകൊണ്ടുള്ള തട്ടിപ്പ് നിയമന ഉത്തരവ് നൽകി.
റെയിൽവേയുമായി ബന്ധപ്പെട്ടപ്പോഴാണ് തട്ടിപ്പ് ബോധ്യമായത്. റെയിൽവേയിലെ ഉന്നതരുമായി ബന്ധമുണ്ടെന്ന് പറഞ്ഞായിരുന്നു തട്ടിപ്പ് .ഇൻസ്പെക്ടർ എ.എൽ അഭിലാഷ്, എസ്.ഐ കെ.കെ ഉണ്ണികൃഷ്ണൻ, സീനിയർ സിപിഒ കെ.കെ ഷിബു സിപിഒമാരായ അരുൺ കെ കരുൺ, കെ.എസ് അനുപ് എന്നിവരാണ് അന്വേഷണ സംഘത്തിലുള്ളത്.
