ന്യൂഡൽഹി ; കുരങ്ങുപനിയുടെ ലക്ഷണങ്ങളുമായി യുവാവിനെ ഡൽഹിയിലെ എയിംസിൽ പ്രവേശിപ്പിച്ചു. വിദേശയാത്ര കഴിഞ്ഞ് തിരിച്ചെത്തിയ യുവാവിന് ചെറിയ പനിയും തലവേദനയ്‌ക്കുമൊപ്പം കുരങ്ങുപനിയുടെ മറ്റ് ലക്ഷണങ്ങളും ഉണ്ടായിരുന്നു. എയിംസിലെ എബി-7 വാർഡിലാണ് ഇയാളെ പ്രവേശിപ്പിച്ചിരിക്കുന്നത് . കുരങ്ങുപനിയെന്ന് സംശയിക്കുന്ന രോഗികൾക്കായി തയ്യാറാക്കിയതാണ് ഈ വാർഡ്. പ്രാഥമിക റിപ്പോർട്ട് നെഗറ്റീവ് ആണെങ്കിലും രോഗി ഇപ്പോഴും നിരീക്ഷണത്തിലാണ്.
എയിംസിൽ കുരങ്ങുപനിയെന്ന് സംശയിക്കുന്ന രോഗികളെ അതായത് കുരങ്ങുപനിയുടെ ലക്ഷണങ്ങളുള്ളവരെ പ്രവേശിപ്പിക്കാനും പരിശോധിക്കാനും ക്രമീകരണങ്ങൾ ഏർപ്പെടുത്തിയതായി എയിംസ് മാധ്യമ വക്താവ് ഡോ. റീമ ദാദ പറഞ്ഞു. പനി, തലവേദന, നടുവേദന, ക്ഷീണം, വിറയൽ, മുഖക്കുരു എന്നിവയുണ്ടെങ്കിൽ കുരങ്ങുപനിയുടെ ലക്ഷണങ്ങളാണ്. അത്തരമൊരു രോഗിയുടെ റിപ്പോർട്ട് പോസിറ്റീവായാൽ രോഗിയെ തുടർ ചികിത്സയ്‌ക്കായി സഫ്ദർജംഗ് ആശുപത്രിയിലേക്ക് റഫർ ചെയ്യും.
കുരങ്ങുപനി ഭീഷണി കണക്കിലെടുത്ത് സർക്കാർ അതീവ ജാഗ്രതയിലാണ്. ഡൽഹിയിലെ മൂന്ന് ആശുപത്രികളിൽ കുരങ്ങുപനി ബാധിച്ചവരുടെ ചികിത്സയ്‌ക്കായി കിടക്കകൾ ക്രമീകരിച്ചിട്ടുണ്ട്. വിമാനത്താവളത്തിലെ ഉദ്യോഗസ്ഥരോട് ജാഗ്രത പാലിക്കാൻ ആവശ്യപ്പെട്ടിട്ടുണ്ട് . കുരങ്ങുപനിയുടെ ലക്ഷണങ്ങൾ കാണിക്കുന്നവരെ ഐസൊലേറ്റ് ചെയ്യാൻ നിർദ്ദേശം നൽകിയിട്ടുണ്ട്. പിപിഇ കിറ്റുകൾ ഉപയോഗിച്ച് രോഗിയെ ചികിത്സിക്കാനും പരിചരിക്കാനും ആരോഗ്യ പ്രവർത്തകർക്ക് നിർദേശം നൽകിയിട്ടുണ്ട്.
പ്രതികരിക്കാൻ ഇവിടെ എഴുതുക: