കോയമ്പത്തൂർ ; റെയിൽ വേ പാളത്തിൽ നിന്ന് സെൽഫിയെടുക്കാൻ ശ്രമിച്ച 51 കാരൻ ട്രെയിനിടിച്ച് മരിച്ചു. കോയമ്പത്തൂർ രത്നപുരി ജീവാനന്ദം റോഡ് സ്വദേശി ശിവദാസ് ആണ് മരിച്ചത് . മോട്ടോർ കമ്പനിയിൽ ജോലി ചെയ്യുകയായിരുന്നു.
രത്നപുരി മേഖലയിലെ റെയിൽവേ ഗേറ്റിന് സമീപമായിരുന്നു അപകടം. രാത്രി ജോലി കഴിഞ്ഞ് വീട്ടിലേക്ക് വരികയായിരുന്ന ശിവദാസ് മേൽപ്പാലത്തിന്റെ താഴത്തെ ഭാഗത്തുള്ള റെയിൽവേ ഗേറ്റിന് സമീപം നിൽക്കുകയായിരുന്നു. ആ സമയം വന്ദേഭാരത് ട്രെയിൻ ചെന്നൈയിൽ നിന്ന് കോയമ്പത്തൂരിലേക്ക് വരികയായിരുന്നു. എന്നാൽ അപകടസാധ്യത കണക്കിലെടുക്കാതെ പാളത്തിന് സമീപം നിന്ന് സെൽഫിയെടുക്കാൻ ശ്രമിക്കുകയായിരുന്നു ശിവദാസ് . ഇതുകണ്ട് ട്രെയിൻ ഡ്രൈവർ ഹോൺ മുഴക്കിയെങ്കിലും പാളത്തിൽ നിന്ന് മാറാൻ ശിവദാസ് കൂട്ടാക്കിയില്ല.
പിന്നാലെ ഇയാളെ ട്രെയിൻ ഇടിച്ചു തെറിപ്പിക്കുകയായിരുന്നു . ശിവദാസ് സംഭവസ്ഥലത്ത് വച്ച് തന്നെ മരണപ്പെട്ടു. ലോക്കോ പൈലറ്റ് നൽകിയ വിവരത്തിന്റെ അടിസ്ഥാനത്തിൽ റെയിൽവേ പോലീസ് സ്ഥലത്തെത്തി മൃതദേഹം പോസ്റ്റ്മോർട്ടത്തിനായി കോയമ്പത്തൂർ മെഡിക്കൽ കോളജ് ആശുപത്രിയിലേക്ക് അയച്ചു.
