വായ്പ തിരിച്ചടയ്‌ക്കാൻ കള്ളനോട്ട് അച്ചടിച്ച നാല് പേർ അറസ്റ്റിൽ

ബംഗളൂരു : വായ്പ തിരിച്ചടയ്‌ക്കാൻ കള്ളനോട്ട് അച്ചടിച്ച നാല് പേർ അറസ്റ്റിൽ . മംഗലാപുരം ഹമ്പനക്കാട്ടാണ് സംഭവം . കാസർകോട് സ്വദേശികളായ വി പ്രിയേഷ് (38), വിനോദ് കുമാർ കെ (33), അബ്ദുൾ ഖാദർ എസ്എം (58), ദക്ഷിണ കന്നഡ ജില്ലയിലെ പുത്തൂർ സ്വദേശി അയൂബ് ഖാൻ (51) എന്നിവരെയാണ് മംഗളൂരു പൊലീസ് അറസ്റ്റ് ചെയ്തത്. ഇവരിൽ നിന്ന് 500 രൂപയുടെ 2,13,500 രൂപയുടെ കള്ളനോട്ടുകൾ പിടികൂടുകയും ചെയ്തു.

പ്രിൻ്റിംഗ് പ്രസ് ഉടമയായ പ്രിയേഷ് കടക്കെണിയിലാണെന്നും വായ്പ തിരിച്ചടയ്‌ക്കാനാണ് കള്ളനോട്ട് അച്ചടിക്കാൻ തുടങ്ങിയതെന്നും സിറ്റി പോലീസ് കമ്മീഷണർ അനുപം അഗർവാൾ പറഞ്ഞു. കോഴിക്കോട്, ഡൽഹി എന്നിവിടങ്ങളിൽ നിന്ന് ഓൺലൈനായി അസംസ്‌കൃത വസ്തുക്കൾ വാങ്ങിയിരുന്നു. യൂട്യൂബിലൂടെ വ്യാജ കറൻസി പ്രിൻ്റ് ചെയ്യുന്നതെങ്ങനെയെന്ന് പഠിച്ചു. കഴിഞ്ഞ മൂന്ന് മാസമായി ഇയാൾ ചെർക്കലിലെ പ്രിൻ്റിംഗ് പ്രസിൽ കള്ളനോട്ട് അച്ചടിച്ചു.

ഉയർന്ന നിലവാരമുള്ള ഇന്ത്യൻ കറൻസി നോട്ടുകൾ പ്രതികൾ അച്ചടിച്ചിരുന്നതായും ഇത് വ്യാജമാണെന്ന് കണ്ടെത്താൻ ബുദ്ധിമുട്ടായിരുന്നുവെന്നും പോലീസ് പറഞ്ഞു. മറ്റ് മൂന്ന് പ്രതികൾ കള്ളനോട്ട് പ്രചരിപ്പിക്കാൻ സഹായിച്ചിരുന്നു.25,000 രൂപ നൽകി ഒരു ലക്ഷം രൂപയുടെ കള്ളനോട്ട് നൽകാൻ ശ്രമിക്കുന്നതിനിടെയാണ് സംഘം പിടിയിലായത്.