സിഡ്‌നി: ക്രിക്കറ്റില്‍ ഏറ്റവും ആദ്യം നടന്ന ടെസ്റ്റ് മത്സരത്തിന്റെ 150-ാം വാര്‍ഷികം സംഘടിപ്പിക്കാനൊരുങ്ങി ക്രിക്കറ്റ് ഓസ്‌ട്രേലിയ.
2027 മാര്‍ച്ചില്‍ ഇംഗ്ലണ്ടും ഓസ്‌ട്രേലിയയും തമ്മില്‍ മെല്‍ബണ്‍ ക്രിക്കറ്റ് ഗ്രൗണ്ടില്‍ ടെസ്റ്റ് മത്സരം കളിച്ചുകൊണ്ടായിരിക്കും ഈ ചരിത്ര വാര്‍ഷികം ആഘോഷിക്കുക.
1877 മാര്‍ച്ചിലായിരുന്നു ഇംഗ്ലണ്ടും ഓസ്‌ട്രേലിയയും ഏറ്റുമുട്ടിയ ലോക ക്രിക്കറ്റിലെ ആദ്യ ടെസ്റ്റ്. മാര്‍ച്ച് 15-19 വരെ നടന്ന അന്നത്തെ മത്സരത്തില്‍ വിരുന്നുകാരായ ഇംഗ്ലണ്ടിനെതിരെ ആതിഥേയരായ ഓസ്‌ട്രേലിയ 45 റണ്‍സിന് വിജയിച്ചു. മെല്‍ബണ്‍ ക്രിക്കറ്റ് ഗ്രൗണ്ടിലാണ് ആ മത്സരം നടന്നത്. ഇതിന്റെ നൂറാം വാര്‍ഷികം ആഘോഷിക്കാന്‍ ഇതേ വേദിയില്‍ 1977ല്‍ നടത്തിയ മത്സരത്തിലും ഓസ്‌ട്രേലിയ 45 റണ്‍സിന് ഇംഗ്ലണ്ടിനെ തോല്‍പ്പിച്ചുവെന്നതാണ് കൗതുകം.
ഓസ്‌ട്രേലിയയിലെ ക്രിക്കറ്റ് ഗവേണിങ് ബോഡി ഇന്നലെയാണ് വാര്‍ഷിക മത്സരം സംബന്ധിച്ച കാര്യങ്ങള്‍ വ്യക്തമാക്കിയത്.
പ്രതികരിക്കാൻ ഇവിടെ എഴുതുക: