മേപ്പാടി: തല പിളര്‍ന്ന് തലച്ചോറ് പുറത്ത് കാണാവുന്ന നിലയിലായിരുന്നു. കണ്ണുകള്‍ക്ക് ഗുരുതരമായി പരിക്കേറ്റ് തൂങ്ങിയ നിലയിലായിരുന്നു. എന്നാല്‍ ദിവസങ്ങള്‍ക്ക് ശേഷം റജീന എബ്രഹാം മെല്ലെ ജീവിതത്തിലേക്ക് തിരിച്ചു വരികയാണ്. ഭര്‍ത്താവ് ജോണി ചിറ്റിലപ്പള്ളിയും മക്കളായ അനുഗ്രഹ്, അഭിനന്ദ് എന്നിവരെ മഹാദുരന്തത്തില്‍ മരണമെടുത്തുവെന്ന വിവരം റജീനക്ക് ഇതുവരെ അറിയില്ല.
പ്രധാനമന്ത്രി ഇന്നലെ നേരില്‍ കണ്ട് സമാശ്വസിപ്പിച്ചത് അനിയത്തിയെ ഉന്മേഷവതിയാക്കിയെന്ന് പരിചരിക്കാന്‍ കൂടെയുള്ള ചേച്ചി ആനിസ് പറഞ്ഞു. ശസ്ത്രക്രിയകളിലൂടെ അവള്‍ ജീവിതത്തിലേക്ക് തിരിച്ചുവരികയാണ്. നരേന്ദ്ര മോദിയുടെ ആശ്വാസവാക്കുകള്‍ ഏറെ ബലം നല്‍കുന്നതാണ്. മക്കളും ഭര്‍ത്താവും നഷ്ടപ്പെട്ട വിവരം അറിയിക്കേണ്ടെന്നാണ് ഡോക്ടര്‍മാരുടെ നിര്‍ദേശം. എന്നാലും ഒരു നാള്‍ ഈ യാഥാര്‍ത്ഥ്യം അവളെ എങ്ങിനെ ധരിപ്പിക്കുമെന്നതിനെക്കുറിച്ച് യാതൊരു പിടിയുമില്ല, ആനിസ് പറഞ്ഞു.
ഭര്‍ത്താവിന്റെ പിടിവിട്ട്, മക്കളെ കൈയില്‍ നിന്ന് വിട്ട് റജീന ബോധരഹിതയായി മലവെള്ളപ്പാച്ചിലൂടെ ഏറെ ഒഴുകി. പാറകളില്‍ തട്ടി ഗുരുതരമായി പരിക്കേറ്റു. 30ന് ഉച്ചകഴിഞ്ഞ് രക്ഷാപ്രവര്‍ത്തകരാണ് റെജീനയെ രക്ഷപ്പെടുത്തി ആശുപത്രിയിലെത്തിച്ചത്.
പ്രതികരിക്കാൻ ഇവിടെ എഴുതുക: