മേപ്പാടി: ദുരന്തത്തില്‍ മരിച്ച ഭാര്യ ഫൂല്‍കുമാരിയുടെ നെറ്റിയില്‍ തിലകം ചാര്‍ത്തി യാത്ര അയയ്‌ക്കാന്‍ ആശുപത്രിക്കിടക്കയില്‍ നിന്നാണ് ബിഹാറുകാരന്‍ ഉപേന്ദ്രപാസ്വാന്‍ ശ്മശാനത്തിലെത്തിയത്. ഹാരിസണ്‍ ടീ എസ്റ്റേറ്റ് തൊഴിലാളികളായിരുന്നു ഇരുവരും. ദുരന്തത്തില്‍ ഭാര്യ മരിച്ചതിന്റെ വേദനയിലാണ് ഉപേന്ദ്ര പാസ്വാന്‍.
സുഹൃത്തുക്കളായ വിഘ്‌നേശ് പാസ്വാന്‍, രണ്‍ജിത് കുമാര്‍, സാധു പാസ്വാന്‍ എന്നിവരുടെ മൃതദേഹങ്ങള്‍ ഇതുവരെ കണ്ടെത്താനായിട്ടില്ല. വാരിയെല്ലും പുറവും തകര്‍ന്ന വേദന ഒരു ഭാഗത്ത്. എസ്റ്റേറ്റ് അധികൃതര്‍ ഇതുവരെ തിരിഞ്ഞു നോക്കിയിട്ടില്ല. ഭാഷയറിയാത്തതിനാല്‍ ആരുമായും വിവരം പങ്ക് വെക്കാനാവുന്നില്ല. വിവരമറിഞ്ഞ് എത്തിയ മൂന്നാര്‍ എസ്റ്റേറ്റ് തൊഴിലാളിയായ ദിലീപ് പാസ്വാനെന്ന ബന്ധു മാത്രമാണ് ആശുപത്രിയില്‍ പരിചരിക്കാനുള്ളത്. ബിഹാറിലെ വൈശാലി ജില്ലയിലെ മുഹമ്മദ്പൂര്‍ സ്വദേശിയാണ് ഉപേന്ദ്ര പാസ്വാന്‍. ഡിസ്ചാര്‍ജ് ചെയ്താലും നാട്ടിലേക്ക് ഉടനെയില്ല. എല്ലാ രേഖകളും നഷ്ടമായി. ബാക്കിയായത് ഭാര്യയുടെ ഒരു ചിത്രം മാത്രം. അത് നെഞ്ചോട് ചേര്‍ത്തുവെച്ച് തേങ്ങുകയാണ് ഈ ബിഹാറുകാരന്‍.
പ്രതികരിക്കാൻ ഇവിടെ എഴുതുക: