തിരുവനന്തപുരം: ചൂരല്മല ദുരന്തത്തില് നൂറോളം മൃതദേഹങ്ങള് തിരിച്ചറിയാന് കഴിയാത്ത സാഹചര്യത്തില് അവ സംസ്കരിക്കുന്നതിന് മാര്ഗനിര്ദേശം പുറത്തിറക്കി.
മൃതശരീരങ്ങളുടെ സൂക്ഷിപ്പ്, കൈമാറ്റം, സംസ്കാരം എന്നിവക്ക് രജിസ്ട്രേഷന് വകുപ്പ് ഐജി ശ്രീധന്യ സുരേഷിനെ നോഡല് ഓഫീസറായി ചുമതലപ്പെടുത്തി. തിരിച്ചറിയാത്ത മൃതദേഹങ്ങള് സംസ്കരിക്കുന്നതിനുമുമ്പായി ഇന്ക്വസ്റ്റ് പോസ്റ്റ്മോര്ട്ടം നടപടികള് ഉണ്ടാവും. പ്രത്യേക തിരിച്ചറിയല് നമ്പര് നല്കും. മൃതദേഹത്തിന്റെയും ശരീരത്തിലെ ആഭരണമുള്പ്പെടെയുള്ള വസ്തുക്കളുടെയും ഫോട്ടോ എടുത്ത് സൂക്ഷിക്കും.
ഡിഎന്എ സാമ്പിള്, പല്ലുകളുമായി ബന്ധപ്പെട്ട വിവരങ്ങള് എന്നിവ എടുത്ത് വെക്കും. പോലീസ് ഇത്തരം മുതദേഹങ്ങള് സംബഡിച്ച് മേപ്പാടി പഞ്ചായത്ത് അധികൃതരെ വിവരമറിയിക്കണം. അടക്കം ചെയ്യുന്ന രീതിയില് മാത്രമേ മൃതദേഹങ്ങള് സംസ്കരിക്കാവൂ. അടക്കം ചെയ്യുന്ന സ്ഥലം മേപ്പാടി പഞ്ചായത്ത് അധികൃതരെ ജില്ലാ ഭരണകൂടം അറിയിക്കണം. ഇന്ക്വസ്റ്റ് നടപടികള് പൂര്ത്തിയാക്കിയാല് 72 മണിക്കൂറിനകം സംസ്കരിക്കണം. മൃതദേഹങ്ങള് ബന്ധപ്പെട്ട തദ്ദേശസ്ഥാപന സെക്രട്ടറിമാര്ക്ക് കൈമാറി നടപടികള് പൂര്ത്തിയാക്കും. സംസ്കരിക്കുന്ന സമയത്ത് പ്രദേശത്തെ പഞ്ചായത്ത്/നഗരസഭാ ഉദ്യോഗസ്ഥര് സന്നിഹിതരായിരിക്കണം. തിരിച്ചറിഞ്ഞ അവകാശികളില്ലാത്ത മൃതദേഹങ്ങള്, അവകാശത്തര്ക്കങ്ങളുള്ള മൃതദേഹങ്ങള്, ശരീരഭാഗങ്ങള് എന്നിവ സംസ്കരിക്കുന്നതിനും ഇതേ മാര്ഗനിര്ദേശങ്ങള് ബാധകമാണ്.
കല്പ്പറ്റ നഗരസഭ, വൈത്തിരി, മുട്ടില്, കണിയാമ്പറ്റ, പടിഞ്ഞാറത്തറ, തൊണ്ടര്നാട്, എടവക, മുള്ളന്കൊല്ലി ഗ്രാമപഞ്ചായത്തുകളിലെ പൊതുശ്മശാനങ്ങളിലാണ് സംസ്കാരത്തിനുള്ള സൗകര്യം ഒരുക്കിയിട്ടുള്ളത്. തിരിച്ചറിയാന് സാധിക്കാത്ത 67 മൃതദേഹങ്ങളാണുള്ളത്. സംസ്കരിക്കുമ്പോള് മതപരമായ ചടങ്ങുകള് നടത്തണമെന്ന ആവശ്യം കണക്കിലെടുത്ത് സര്വ്വമത പ്രാര്ത്ഥന നടത്തുന്നതിനു പഞ്ചായത്തുകള്ക്ക് മുന്കയ്യെടുക്കാമെന്ന് മുഖ്യമന്ത്രി പിണറായി വിജയന് നിര്ദ്ദേശം നല്കിയിട്ടുണ്ട്.
തീവ്രമഴയുടെ പ്രവചനം മെച്ചപ്പെടുത്തുന്നതിനായി കേരളത്തിന് അനുസൃതമായ മോഡല് പാരാമീറ്റേഴ്സ് വികസിപ്പിക്കുന്നതിന് പഠനങ്ങള് നടത്താന് കോട്ടയത്തെ കാലാവസ്ഥ വ്യതിയാന പഠനകേന്ദ്രത്തോട് ആവശ്യപ്പെടുമെന്ന് മുഖ്യമന്ത്രി പിണറായി വിജയന് വാര്ത്താ സമ്മേളനത്തില് പറഞ്ഞു. ഇത്തരം പഠന ഫലങ്ങളിലൂടെ ഉരുള്പൊട്ടല്, വെള്ളപ്പൊക്കം, ചുഴലിക്കാറ്റുകള് തുടങ്ങിയ പ്രകൃതിദുരന്തങ്ങള്ക്കുള്ള വിപുലമായ പ്രവചന ഉപാധികള് ലഭ്യമാക്കാനാണ് ഉദ്ദേശിക്കുന്നതെന്നും മുഖ്യമന്ത്രി പറഞ്ഞു.
