കല്പറ്റ: വയനാട്ടിലെ ഉരുള്പൊട്ടല് ദുരന്തത്തില്പ്പെവരുടെ മൃതദേഹങ്ങളും ശരീരഭാഗങ്ങളും ഒഴുകിയെത്തുന്ന ചാലിയാറില് വ്യാപക തെരച്ചില് നടത്തുമെന്ന് പോലീസ്. 40 കിലോമീറ്റര് പരിധിയിലും തെരച്ചില് നടക്കും.പന്തീരാങ്കാവ്, മാവൂര്, മുക്കം, വാഴക്കാട് പോലീസ് എന്നിവരുടെയും ടിഡിആര്എഫ് വോളണ്ടിയര്മാരുടെയും നേതൃത്വത്തിലാണ് തിരച്ചില്. കോസ്റ്റ് ഗാര്ഡും തെരച്ചിലിന്റെ ഭാഗമാകും.
ബോട്ടുകള് ഉപയോഗിച്ചാണ് തിരച്ചില് നടത്തുന്നത്. കഴിഞ്ഞദിവസം മണന്തലക്കടവ് ഭാഗത്ത് നിന്ന് 10 വയസ്സുകാരിയുടെ മൃതദേഹം ലഭിച്ചിരുന്നു. ഇന്നലെ അറപ്പുഴ കടവില് നിന്ന് പുരുഷന്റെ കാലും ലഭിച്ചിരുന്നു. ഈ സാഹചര്യത്തിലാണ് കോഴിക്കോട് – മലപ്പുറം ജില്ലാ അതിര്ത്തിയില് തിരച്ചില് ഊര്ജിതമാക്കിയിരിക്കുന്നത്. പുഴ അവസാനിക്കുന്ന കോഴിക്കോട് ജില്ലയിലും വിവിധ പോലീസ് സ്റ്റേഷനുകള് കേന്ദ്രീകരിച്ച് പരിശോധന നടക്കുന്നുണ്ടെന്ന് എ.ഡി.ഡി.പി എം.ആര്.അജിത് കുമാര് പറഞ്ഞു.
മുണ്ടക്കൈ, ചൂരല്മല മേഖലയില് 40 ടീമുകള് തെരച്ചില് മേഖല 6 സോണുകളായി തിരിച്ചാണ് തെരച്ചില് പ്രവര്ത്തനങ്ങള് നടത്തുക. അട്ടമലയും ആറന്മലയും ചേര്ന്നതാണ് ആദ്യത്തെ സോണ്. മുണ്ടക്കൈ രണ്ടാമത്തെ സോണും പുഞ്ചിരിമട്ടം മൂന്നാമത്തേതും വെള്ളാര്മല വില്ലേജ് റോഡ് നാലാമത്തേതും ജിവിഎച്ച്എസ്എസ് വെള്ളാര്മല അഞ്ചാമത്തെ സോണും പുഴയുടെ അടിവാരം ആറാമത്തെ സോണുമാണ്.
ഓരോ ടീമിലും മൂന്നു നാട്ടുകാരും ഒരു വനംവകുപ്പ് ജീവനക്കാരനും ഉണ്ടാവും. 240 പേരെ ഇനിയും കണ്ടെത്താനുണ്ടെന്നാണ് വിവരം. 1700 പേര് ദുരിതാശ്വാസ ക്യാമ്പുകളില് കഴിയുകയാണ്. ഇന്നലെ നടത്തിയ തെരച്ചിലില് 40 മൃതദേഹങ്ങളാണ് കണ്ടെത്തിയത്.
