തിരുവനന്തപുരം: വയനാട് ദൂരിതത്തിന്റെ പശ്ചാത്തലത്തില് സന്നദ്ധ സംഘടനകളുടെ പേരില് അടക്കം ഒറ്റയ്ക്കും കൂട്ടായും പല സ്ഥലങ്ങളായി നടക്കുന്ന പണപ്പിരിവും ഭക്ഷണവും വസ്ത്രവും അടക്കമുള്ള വസ്തുക്കളുടെ ശേഖരണം നിര്ത്തിവെക്കണമെന്ന് മുഖ്യമന്ത്രി അഭ്യര്ത്ഥിച്ചു.
ഈ ഘട്ടത്തില് അത് ഉപകാരപ്പെടുന്ന ഒരു പ്രക്രിയയല്ല. അതുകൊണ്ട് അതില് പങ്കാളികള് ആയിരിക്കുന്നവര് അതില് നിന്ന് പിന്മാറണം. ശേഖരിച്ച വസ്തുക്കള് അതത് ജില്ലകളിലെ കളക്ടറേറ്റുകളിലേക്ക് കൈമാറണം. ഇനി എന്തെങ്കിലും ആവശ്യങ്ങള് വന്നാല് ദുരന്തനിവാരണ അതോറിറ്റി അറിയിക്കും.
ഉരുള്പൊട്ടല് ഉണ്ടായ മേഖലയിലേക്ക് വയനാട് ജില്ല ഭരണസംവിധാനത്തിന്റെ മേല്നോട്ടത്തില് വസ്ത്രവും ഭക്ഷണവും മറ്റ് അവശ്യവസ്തുക്കളും ശേഖരിക്കുന്നുണ്ട്. അത് കൃത്യമായി പരിക്കേറ്റ് ചികിത്സയില് കഴിയുന്നവര്ക്കും ദുരിതാശ്വാസ ക്യാമ്പുകളില് കഴിയുന്നവര്ക്കും എത്തിച്ചു നല്കുകയും ചെയ്യുന്നു. എന്നാല് ദുരിതബാധിതരെ സഹായിക്കാന് എന്ന പേരില് നടക്കുന്ന ചില പ്രവര്ത്തനങ്ങള് ഈ ഘട്ടത്തില് ഒഴിവാക്കേണ്ടതാണ്. മുഖ്യമന്ത്രി പറഞ്ഞു.
