ഒളിംപിക്സ് ടേബിള്‍ ടെന്നീസ്: മണിക ബത്ര പ്രീ ക്വാര്‍ട്ടറില്‍

പാരീസ്: ഒളിംപിക്സ് ടേബിള്‍ ടെന്നീസില്‍ പുതിയ ചരിത്രം കുറിച്ച് ഭാരത വനിത മണിക ബത്ര. ഇതോടെ ഒളിംപിക്‌സ് ടേബിള്‍ ടെന്നീസില്‍ സിംഗിള്‍സ് പോരാട്ടത്തില്‍ പ്രീക്വാര്‍ട്ടറിലെത്തുന്ന ആദ്യ ഭാരത താരമെന്ന നേട്ടവും 29-കാരിയായ മണിക സ്വന്തം പേരിലാക്കി. റാങ്കിങ്ങില്‍ തന്നേക്കാള്‍ മുന്നിലുള്ള ഫ്രാന്‍സിന്റെ ഇന്ത്യന്‍ വംശജയായ പ്രിതിക പാവഡെയെ പരാജയപ്പെടുത്തിയാണ് മണിക പ്രീക്വാര്‍ട്ടറിലെത്തിയത്.

നാലു ഗെയിമും സ്വന്തമാക്കിയായിരുന്നു 28-ാം റാങ്കുകാരിയായ മണികയുടെ മുന്നേറ്റം. സ്‌കോര്‍: 11-9, 11-6, 11-9, 11-7. ലോക റാങ്കിങ്ങില്‍ 19-ാം സ്ഥാനത്തുള്ള താരമാണ് പ്രിതിക. ഹോങ്കോങ്ങിന്റെ സു ചെങ്ഷു, ജപ്പാന്റെ മിയു ഹിരാനോ മത്സര വിജയിയെയാണ് പ്രീക്വാര്‍ട്ടറില്‍ മണിക ബത്ര നേരിടുക.