കൊച്ചി: യുഡിഎഫ് വനിതാ കൗണ്സിലര് ഹോട്ടല് ജീവനക്കാരിയെ മര്ദിച്ചെന്ന് പരാതി. കൊച്ചി നഗരസഭയിലെ കൗണ്സിലര് സുനിത ഡിക്സനെതിരെയാണ് പരാതി. ഹോട്ടലിന് സമീപമുളള കാന പൊളിച്ചുനീക്കണമെന്ന് ആവശ്യപ്പെട്ട് എത്തിയ കൗണ്സിലര് വാക്കുതര്ക്കത്തിനിടെയാണ് ഹോട്ടല് ജീവനക്കാരിയെ മര്ദ്ദിച്ചത് എന്നാണ് പരാതി.
ഹോട്ടല് പ്രവര്ത്തിക്കുന്നത് വൈറ്റില ജംഗ്ഷനിലാണ്. ഈ ഹോട്ടലിലെ ജീവനക്കാരിയെയാണ് സുനിത ഡിക്സണ് മര്ദിച്ചത് എന്നാണ് പരാതി. നേരത്തെ പല പ്രാവശ്യം വനിത കൗണ്സിലര് ഹോട്ടലില് നിന്നും പണം വാങ്ങിയിട്ടുണ്ടെന്നും അടുത്ത കാലത്ത് 15 ലക്ഷം രൂപ ആവശ്യപ്പെട്ടത് നല്കാതിരുന്നതാണ് സുനിതാ ഡിക്സന്റെ വിരോധത്തിന് കാരണമെന്നും ഹോട്ടല് ജീവനക്കാരും മാനേജ്മെന്റും പറഞ്ഞു. പണം നല്കാതിരുന്നതോടെ ഹോട്ടല് സ്ഥലം കയ്യേറിയെന്ന് സ്ഥാപിക്കാന് ശ്രമിച്ചു.
ഇതിന്റെ ഭാഗമായി കയ്യേറ്റം ഒഴിപ്പിക്കാനെന്ന പേരില്, നോട്ടീസ് പോലും നല്കാതെ ഇന്ന് കൗണ്സിലര് സുനിതാ ഡിക്സണ് എത്തി. ഇതേച്ചൊല്ലിയുണ്ടായ തര്ക്കത്തിനിടെയാണ് കയ്യേറ്റം നടന്നതെന്നാണ് ഹോട്ടല് ജീവനക്കാര് പറയുന്നത്. ഇവര് മരട് പൊലീസ് സ്റ്റേഷനില് പരാതി നല്കി.
എന്നാല് താന് മര്ദ്ദിച്ചിട്ടില്ലെന്നാണ് സുനിതാ ഡികസന്റെ വാദം. വീഡിയോ എടുക്കാന് ശ്രമിച്ചപ്പോള് മൊബൈല് ഫോണ് തട്ടി മാറ്റുകയാണുണ്ടായതെന്നും അവര് പറഞ്ഞു. ഹോട്ടല് തോട് കൈയേറിയത് ചോദ്യം ചെയ്യുകയായിരുന്നു താനെന്നും ഹോട്ടല് ജീവനക്കാര് തന്നെയാണ് മര്ദിച്ചതെന്നുമാണ് സുനിത പറയുന്നത്.
