തിരുവനന്തപുരം: ശുചീകരണ തൊഴിലാളി ജോയിയെ കാണാതായ ആമയിഴഞ്ചാന്‍ തോട് വ്യത്തിയാക്കുന്നതുമായി ബന്ധപ്പെട്ട് പരസ്പരം പഴിചാരി കോര്‍പ്പറേഷനും റെയില്‍വേയും.തോട് വ്യത്തിയാക്കുന്നതില്‍ റെയില്‍വേ അലംഭാവം കാട്ടിയെന്ന മേയര്‍ ആര്യാ രാജേന്ദ്രന്റെ ആരോപണങ്ങള്‍ തളളിയ റെയില്‍വേ എഡിആര്‍എം എം ആര്‍ വിജി, റെയില്‍വേയുടെ ഭാഗത്തുളള തോട് വൃത്തിയാക്കേണ്ടതിന്റെ ചുമതലയും കോര്‍പ്പറേഷനാണെന്ന് പറഞ്ഞു.
റെയില്‍വെ ട്രാക്കിന് അടിയിലൂടെ കടന്നുപോകുന്ന ടണല്‍ വൃത്തിയാക്കാന്‍ കോര്പറേഷന് അനുമതി തേടി കത്ത് നല്‍കിയിട്ടും റെയില്‍വേ മറുപടി നല്‍കിയില്ലെന്ന മേയറുടെ ആരോപണം റെയില്‍വേ തളളി. ഒരു തവണ പോലും കത്ത് നല്‍കിയിട്ടില്ലെന്നാണ് റെയില്‍വേ എഡിആര്‍എം പറഞ്ഞത്. അനുവാദം ചോദിച്ചിട്ടും നല്‍കിയില്ലെന്ന മേയറുടെ വാദം പച്ചക്കള്ളമാണെന്നും ഭാവിയിലും ടണല്‍ വൃത്തിയാക്കാന്‍ കോര്പറേഷന് ഒരു തടസവും ഉണ്ടാവില്ലെന്നും റെയില്‍വേ അറിയിച്ചു.
റെയില്‍വേ ഖര മാലിന്യം തോട്ടില്‍ കളയുന്നില്ല. വെള്ളം മാത്രമേ ഒഴുകി വിടുന്നുളളു. 2015,2017,2019 വര്‍ഷങ്ങളില്‍ കോര്‍പ്പറേഷനാണ് ഈ ഭാഗം വൃത്തിയാക്കിയത്. ഇത്തവണ കോര്‍പ്പറേഷന്‍ അസൗകര്യം അറിയിച്ചപ്പോള്‍ നല്ല ഉദ്ദേശത്തോടെ റെയില്‍വേ ഏറ്റെടുത്തു. ഖര മാലിന്യം പൂര്‍ണമായും ഒഴുകിയെത്താതിരിക്കാന്‍ പാഴ്സല്‍ ഓഫീസിന് സമീപമുള്ള കമ്പിവലയുടെ കണ്ണികള്‍ ചെറുതാക്കുമെന്നും റെയില്‍വേ വ്യക്തമാക്കി.
എന്നാല്‍ പിറ്റ് ലൈനിന് താഴെയുള്ള മാല്യന്യങ്ങളുടെ ചുമതല റെയില്‍വേയ്‌ക്ക് തന്നെയെന്ന് മേയര്‍ മറുപടി നല്‍കി. റെയില്‍വേ ഖരമാലിന്യം സ്വന്തം നിലയില്‍ സംസ്‌കരിക്കുന്നുവെന്ന വാദം ശരിയല്ല. അങ്ങനെ ചെയ്യുന്നുണ്ടെങ്കില്‍ നഗരസഭയ്‌ക്ക് മുന്നില്‍ തെളിയിക്കട്ടെ. ടണലില്‍ റെയില്‍വേ ഖരമാലിന്യം നിക്ഷേപിക്കുന്നത് ഇന്നലെ നടത്തിയ തെരച്ചില്‍ തന്നെ തെളിഞ്ഞിരുന്നുവെന്നും ഭാവിയില്‍ മാലിന്യ സംസ്‌കരണം സംബന്ധിച്ച് റെയില്‍വേ മറുപടി പറയേണ്ടി വരുമെന്നും ആര്യാരാജേന്ദ്രന്‍ പറഞ്ഞു.
