ന്യൂദല്ഹി: ഡിജിപബ് ഇന്ത്യാ വിരുദ്ധ പ്രചരണത്തിനായി സോറോസ് ഫണ്ട് വരുത്തുന്നത് വളഞ്ഞ വഴികളിലൂടെയെന്ന് ഇന്റലിജന്സ് ബ്യൂറോ റിപ്പോര്ട്ട്. ഗ്രെറ്റാ തന്ബര്ഗിന്റെ ഇന്ത്യാ വിരുദ്ധ ടൂള് കിറ്റുകള് ഡിജിപബ് പോര്ട്ടല് നെറ്റ് വര്ക്ക് വഴി പ്രചരിപ്പിക്കുന്നതിനായി കോടിക്കണക്കിനു ഡോളറാണ് ഇന്ത്യയിലേക്ക് എത്തിയത്. നരേന്ദ്ര മോദി സര്ക്കാര് 2016 ല് ജോര്ജ് സോറോസിന്റെ ഓപ്പണ് സൊസൈറ്റി ഫൗണ്ടേഷന്റെ ഫണ്ടു സ്വീകരിക്കുന്നതിന് ഇന്ത്യയിലെ സന്നദ്ധ സംഘടനകള്ക്ക് നിയന്ത്രണം ഏര്പ്പെടുത്തിയിരുന്നു. ഇതിനു ശേഷം വളഞ്ഞ വഴികളിലൂടെയാണ് സോറോസ് ഫണ്ട് ഡിജിപബ് പോര്ട്ടലുകള്ക്കും മാധ്യമ പ്രവര്ത്തകര്ക്കും എത്തിക്കുന്നത്.
സോറോസിന്റെ വളഞ്ഞ വഴികള് ഏതെല്ലാമെന്നു നോക്കാം.
1. വ്യാജ സേവന കയറ്റുമതി: വിദേശ സ്ഥാപനങ്ങള്ക്ക് സേവനങ്ങള് ലഭ്യമാക്കിയെന്ന വ്യാജ ബില്ലുകളുടെ പേരില് കോടിക്കണക്കിനു ഡോളര് ഡിജിപബ് പോര്ട്ടലുകള്ക്ക് ലഭിച്ചു. വിദേശ ഫണ്ടു പറ്റി രാജ്യദ്രോഹ വാര്ത്തകള് പ്രചരിപ്പിച്ചതിന് യു എ പി എ ചുമത്തപ്പെട്ട ന്യൂസ് ക്ലിക്ക് എഡിറ്റര് പ്രബീര് പുര്കായസ്ത ഈ മാര്ഗമാണു സ്വീകരിച്ചതെന്ന് ഇഡി കണ്ടെത്തി. ഡിജി പബ് വൈസ് ചെയര്മാനാണ് പ്രബീര് പുര് കായസ്ത . ഡിജിപബിലെ മറ്റേതെല്ലാം പോര്ട്ടലുകള് ഇതേ രീതിയില് കള്ളപ്പണ ഇടപാടു നടത്തിയെന്ന് കണ്ടെത്തുന്നതിനായി ഇഡി ചില പോര്ട്ടലുകളുടെ ഓഫിസ് റെയ്ഡ് ചെയ്തിരുന്നു. സബ്സ്ക്രിപ്ഷന് വരുമാനമെന്ന തരത്തിലും ന്യൂസ്മിനിട്ട്, ന്യൂസ് ലൗണ്ട്രി പോര്ട്ടലുകള്ക്ക് വിദേശത്തു നിന്നു പണം എത്തുന്നുണ്ട്.
2. പോയ്ന്റര് ഇന്സ്റ്റിറ്റിയൂട്ട് : ജോര്ജ് സോറോസിന്റെ ഓപ്പണ് സൊസൈറ്റി ഫൗണ്ടേഷന് ഫണ്ടില് പ്രവര്ത്തിക്കുന്ന പോയ്ന്റര് ഇന്സ്റ്റിറ്റിയൂട്ടിനു കീഴിലുള്ള ഇന്റര്നാഷണല് ഫാക്ട് ചെക്കിങ് ഇന്സ്റ്റിറ്റിയൂട്ട് മുഖേന ഡിജിപബിലെ പല പോര്ട്ടലുകള്ക്കും പരിശീലനത്തിനെന്ന പേരില് സഹായം ലഭ്യമാക്കുന്നുണ്ട്. വ്യാജ വാര്ത്തകളുടെ പ്രഭവ കേന്ദ്രമായ ഓള്ട്ട് ന്യൂസിനാണ് ഇന്റര്നാഷനല് ഫാക്ട് ചെക്കിങ് നെറ്റ് വര്ക്ക് ഇന്ത്യയില് സര്ട്ടിഫിക്കേഷന് നല്കിയിട്ടുള്ളതെന്ന് അറിയുമ്പോള് അജന്ഡ വ്യക്തം. വ്യാജ വാര്ത്തകളുടെ പേരില് പല തവണ ജയില്വാസം അനുഭവിച്ചയാളാണ് ഓള്ട്ട് ന്യൂസ് എഡിറ്റര് മുഹമ്മദ് സുബൈര്.
3.കോമണ്വെല്ത്ത് ഹ്യൂമന് റൈറ്റ്സ് ഇനിഷ്യേറ്റീവ് : ഓപ്പണ് സൊസൈറ്റി ഫൗണ്ടേഷനില് നിന്നു നേരിട്ടു ഫണ്ടു സ്വീകരിക്കുന്നതിനു ഡല്ഹിയിലെ കോമണ്വെല്ത്ത് ഹ്യൂമന് റൈറ്റ്സ് ഇനിഷ്യേറ്റീവിനു വിലക്കു വീണതോടെ സോറോസ് റൂട്ടു മാറ്റിപ്പിടിച്ചു. യുകെയിലെ കോമണ്വെല്ത്ത് ഹ്യൂമന് റൈറ്റ്സ് ഇനിഷ്യേറ്റീവിന് സോറോസ് നല്കുന്ന ഫണ്ട് ഡല്ഹിയിലെ ഇനിഷ്യേറ്റീവ് അക്കൗണ്ടിലേക്കു കൈമാറും.
മനുഷ്യാവകാശ പ്രവര്ത്തനങ്ങള്ക്കും വാര്ത്തകള്ക്കും ഫെലോഷിപ്പും അവാര്ഡുകളുമെന്ന പേരില് ഈ ഫണ്ട് ഡിജിപബ് പോര്ട്ടലുകളിലെത്തും.
4. നാഷനല് ഫൗണ്ടേഷന് ഫോര് ഇന്ത്യ മീഡിയ ഫെലോഷിപ്പ് : ഇന്ത്യാ വിരുദ്ധ വാര്ത്തകളില് തല്പരരായ മാധ്യമ പ്രവര്ത്തകരെ കണ്ടെത്തി ഫെലോഷിപ്പ് നല്കുന്നതാണ് പദ്ധതി. ഡിജിപബ് ചെയര്പേഴ്സന് ധന്യ രാജേന്ദ്രനും ദ് വയര് എഡിറ്റ വുമാണ് ഫെലോഷിപ്പ് സെലക്ഷന് കമ്മിറ്റിയില്. ഇന്ത്യാ വിരുദ്ധ വാര്ത്തയൊന്നിന് പ്രതിഫലം 30,000 രൂപ.
5. ഐപിഎസ് എം എഫ് / എംഡി ഐ എഫ്: ന്യൂസ് മിനിട്ട്, ദ് വയര് തുടങ്ങിയ പോര്ട്ടലുകള്ക്ക് ധനസഹായം നല്കുന്ന സംഘടനകളാണിവ. ഓപ്പണ് സൊസൈറ്റി ഫൗണ്ടേഷന്റെ പണമാണ് രണ്ടിന്റെയും മൂലധനം.
6. 350.ഒആര്ജി സന്നദ്ധ സംഘടന: ടൈഡ്സ് ഫൗണ്ടേഷന്റെ ധനസഹായത്തോടെ പ്രവര്ത്തിക്കുന്ന ഈ സന്നദ്ധ സംഘടനയാണ് ഡിജി പബിലെ ഏറെ പോര്ട്ടലുകള്ക്ക് താങ്ങായി നില്ക്കുന്നത്.
7. വിദേശ ഷെല് കമ്പനികള് : വിദേശത്തു നിന്നു കള്ളപ്പണം എത്തിക്കുന്നതിനു ഡിജിപബിലെ ചില പോര്ട്ടലുകള് വിദേശ രാജ്യങ്ങളില് രഹസ്യമായി ഷെല് കമ്പനികള് നടത്തുന്നുണ്ട്. ഒരു വര്ഷത്തില് താഴെ പ്രവര്ത്തിപ്പിച്ച് പൂട്ടിടും. ഇടപാടുകള് അതിനകം നടത്തിയെടുക്കും. ഒരു വര്ഷം പൂര്ത്തിയാക്കാത്തതിനാല് വാര്ഷിക റിട്ടേണ് ഫയല് ചെയ്യാതെ തടിയൂരും. പണം പുതിയ ഷെല് കമ്പനിയിലേക്കു മാറ്റി തട്ടിപ്പു തുടരും.
ഡിജിപബ് പോര്ട്ടല് ശ്യംഖലയുടെ ഇന്ത്യാ വിരുദ്ധ പ്രവര്ത്തനങ്ങളെയും കള്ളപ്പണ ഇടപാടുകളെയും കുറിച്ച് ഐബി വിശദ റിപ്പോര്ട്ട് ആഭ്യന്തര മന്ത്രാലയത്തിനു സമര്പ്പിച്ചിട്ടുണ്ട്.
വ്യാജ സേവന കയറ്റുമതി; ഷെല് കമ്പനികള്;ഫെലോഷിപ്പ്: സോറോസ് ഫണ്ട് കൈപ്പറ്റുന്നതു വളഞ്ഞ വഴികളില്
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.