കാസര്കോട്: ഹൈക്കോടതി ഇടപെട്ടിട്ടും സര്ക്കാര് പെന്ഷന് നിഷേധിക്കുകയാണെന്ന് കാസര്കോട് ഗവ. കോളജ് മുന് പ്രിന്സിപ്പല് എം. രമ. ഇടത് അദ്ധ്യാപക സംഘടനയും എസ്എഫ്ഐയും വേട്ടയാടുകയാണെന്നും ഗവ. കോളേജില് ഇപ്പോഴും ക്രമക്കേടുകള് നടക്കുന്നുണ്ടെന്നും എം. രമ മാധ്യമങ്ങളോട് പറഞ്ഞു. കാസര്കോട് ഗവ. കോളജില് പ്രിന്സിപ്പലായിരിക്കെ എസ്എഫ്ഐ നടത്തിയ ക്രിമിനല് പ്രവര്ത്തനങ്ങളെ ചോദ്യം ചെയ്തിനാണ് സര്ക്കാരിന്റെ പ്രതികാര നടപടി. പെന്ഷനെ കുറിച്ച് ചോദിക്കുമ്പോഴെല്ലാം അപേക്ഷ പരിശോധിക്കുന്നുവെന്നാണ് മറുപടി.
ലഹരി ഉപയോഗിക്കുകയും അസാന്മാര്ഗിക പ്രവര്ത്തനങ്ങള് നടത്തുകയും ചെയ്ത എസ്എഫ്ഐക്കാരെ പ്രിന്സിപ്പല് ചോദ്യം ചെയ്തിരുന്നു. ഇതേത്തുടര്ന്ന് എസ്എഫ്ഐ നേതാക്കളുടെ സമ്മര്ദങ്ങള്ക്ക് വഴങ്ങിയാണ് സര്ക്കാര് നടപടിയെന്ന് രമയുടെ ആരോപണം.
സ്ഥലംമാറ്റിയതും പെന്ഷന് തടഞ്ഞതുമടക്കമുള്ള നടപടികള് റദ്ദാക്കി ഏപ്രില് ആദ്യവാരമാണ് ഹൈക്കോടതി ഉത്തരവിട്ടത്. കോടതി ഉത്തരവിന്റെ കോപ്പി സഹിതം വീണ്ടും അപേക്ഷിച്ച് മൂന്ന് മാസം പിന്നിട്ടിട്ടും രമയ്ക്ക് പെന്ഷന് കിട്ടിയിട്ടില്ല.
അവസാനം ജോലി ചെയ്ത മഞ്ചേശ്വരം ഗവ. കോളജിലേക്കും ഡയറക്ടര്ക്കും എല്ലാ ആഴ്ചയും കത്ത് അയച്ചുകൊണ്ടിരിക്കുകയാണ് രമ. പരാതി സര്ക്കാരിലേക്ക് അയച്ചതായാണ് കൊളീജിയറ്റ് ഡയറക്ടറേറ്റില് നിന്ന് ഒടുവില് ലഭിച്ച മറുപടി.
എല്ലാ ന്യായവും തെളിവും തനിക്ക് അനുകൂലമായിരുന്നിട്ടും അദ്ധ്യാപകരാരും കൂടെനിന്നില്ല. എസ്എഫ്ഐയെ പിന്തുണയ്ക്കാന് അദ്ധ്യാപകരില് ചിലര് കളവ് പറഞ്ഞതായും രമ ജന്മഭൂമിയോട് പറഞ്ഞു.
ജന്മഭൂമി ഓണ്ലൈന്