കൊച്ചി: ഹിന്ദുക്കള് അക്രമികളും വെറുപ്പ് പ്രചരിപ്പിക്കുന്നവരും അസത്യം പറയുന്നവരുമാണെന്ന കോണ്ഗ്രസ് നേതാവ് രാഹുലിന്റെ ലോക്സഭയിലെ പ്രസംഗത്തില് പ്രതിഷേധിച്ച് ഇന്ന് എല്ലാ താലൂക്ക് കേന്ദ്രങ്ങളിലും പ്രതിഷേധ പ്രകടനം നടത്തി കോലം കത്തിക്കുമെന്ന് ഹിന്ദു ഐക്യവേദി സംസ്ഥാന പ്രസിഡന്റ് ആര്.വി. ബാബു പറഞ്ഞു.
പ്രതിപക്ഷ നേതൃസ്ഥാനത്തിരുന്നു നിരുത്തരവാദപരമായി പ്രസംഗിച്ച രാഹുല് മുഴുവന് ഹിന്ദുക്കളോടും മാപ്പുപറയണം. രാഷ്ട്രീയ നേട്ടത്തിന് വേണ്ടി ഹിന്ദുക്കളെ അപമാനിക്കുന്ന പ്രസ്താവനകള് ചില കോണുകളില് നിന്നും നിരന്തരം ഉയരുന്നത് അംഗീകരിക്കാനാവില്ല. ഹിന്ദു ധര്മ്മത്തില് ഒരു ശക്തിയുണ്ടെന്നും അതിനെ നശിപ്പിക്കണമെന്നും പ്രസംഗിച്ചത് ഇതേ രാഹുലാണ്. ഹിന്ദു ഭീകരവാദം, കാവിഭീകരത തുടങ്ങിയ ആക്ഷേപങ്ങള് നടത്തിയതും ഇവരാണ്.
യുപിഎ ഭരണ കാലത്ത് സോണിയയുടെ നേതൃത്വത്തില് പ്രധാനമന്ത്രിക്കും മേലെ ഭരണഘടനാ ബാഹ്യമായി പ്രവര്ത്തിച്ചിരുന്ന ഉപദേശക സമിതി കമ്മ്യൂണല് വയലന്സ് ബില് കൊണ്ടുവന്ന് രാജ്യത്തെ എല്ലാ കലാപങ്ങളുടെയും ഉത്തരവാദികള് ഹിന്ദുക്കളാണെന്ന് സ്ഥാപിക്കാന് ശ്രമിച്ചു. ശ്രീരാമന് ജനിച്ചതിന് തെളിവില്ലെന്ന് രാമസേതു വിഷയത്തില് യുപിഎ സര്ക്കാര് സുപ്രീം കോടതിയില് സത്യവാങ്മൂലം നല്കി. സനാതന ധര്മ്മത്തെ നശിപ്പിക്കണമെന്ന് പരസ്യമായി ആവശ്യപ്പെടുന്ന ഡിഎംകെയുമായി ചേര്ന്നാണ് രാഹുല് പ്രതിപക്ഷ നേതാവ് സ്ഥാനത്തിരിക്കുന്നത്. രാഹുലിന്റെ ഹിന്ദു വിരുദ്ധ പ്രസ്താവനെയെ അപലപിക്കാന് സാമൂഹ്യ സാംസ്കാരിക നേതാക്കള് തയാറാവണമെന്ന് ബാബു ആവശ്യപ്പെട്ടു.
