രജൗരി: തീര്‍ത്ഥാടകരുടെ ജീവനെടുത്ത റിയാസി ഭീകരാക്രമണവുമായി ബന്ധപ്പെട്ട് വ്യാപക തെരച്ചിലുമായി ദേശീയ അന്വേഷണ ഏജന്‍സി. റിയാസിയിലും രജൗരിയിലുമായി അഞ്ച് സ്ഥലങ്ങളിലാണ് എന്‍ഐഎ തെരച്ചില്‍ നടത്തിയത്.
റിയാസി ഭീകരാക്രമണവുമായി ബന്ധപ്പെട്ട് ഹകം ഖാന്‍ എന്ന് വിളിപ്പേരുള്ള ഹകം ദിന്‍ അറസ്റ്റിലായിരുന്നു. ഭീകരര്‍ക്ക് ഭക്ഷണവും താമസവും ഒരുക്കി നല്കിയത് ഇയാളാണ്. ഹകം ഖാനില്‍ നിന്ന് ലഭിച്ച വിവരങ്ങളുടെ അടിസ്ഥാനത്തിലാണ് എന്‍ഐഎ വിവിധ സ്ഥലങ്ങളില്‍ തെരച്ചില്‍ നടത്തിയത്. ഭീകരപ്രവര്‍ത്തനങ്ങളുമായി ബന്ധപ്പെട്ട് നിരവധി വസ്തുക്കള്‍ അന്വേഷണ സംഘം കണ്ടെത്തിയിട്ടുണ്ട്. വിശദാംശങ്ങള്‍ പുറത്തുവിട്ടിട്ടില്ല.
റിയാസി ഭീകരാക്രമണത്തില്‍ രണ്ടര വയസുള്ള കുട്ടിയടക്കം പത്ത് പേരാണ് കൊല്ലപ്പെട്ടത്. ശിവ്‌ഖോരിയില്‍ ദര്‍ശനം നടത്തി കത്രയിലേക്ക് പോകുന്ന വഴിയിലാണ് ആക്രമണമുണ്ടായത്. ഇവര്‍ സഞ്ചരിച്ചിരുന്ന ബസിനു നേരെ മുഖംമൂടി ധരിച്ചെത്തിയ രണ്ട് ഭീകരര്‍ വെടിയുതിര്‍ക്കുകയും വാഹനം നിയന്ത്രണം വിട്ട് മലയടിവാരത്തിലേക്ക് പതിക്കുകയായിരുന്നു.
പ്രതികരിക്കാൻ ഇവിടെ എഴുതുക: