ബെംഗളൂരു: കര്ണാടക ഹവേരി ബ്യാദഗിയില് മിനി ബസും ട്രക്കും കൂട്ടിയിടിച്ചുണ്ടായ അപകടത്തില് 13 പേര് കൊല്ലപ്പെട്ടു. മരിച്ചവരില് രണ്ട് പേര് കുട്ടികളാണ്. ഇന്നലെ രാവിലെയാണ് അപകടം. ശിവമോഗ, ബെളഗാവി യെല്ലമ്മ ക്ഷേത്രങ്ങളില് ദര്ശനം നടത്തി മടങ്ങുകയായിരുന്ന തീര്ത്ഥാടകരാണ് അപകടത്തില്പ്പെട്ടത്.
ഗുണ്ടെന്ഹള്ളി ക്രോസിന് സമീപത്ത് സ്റ്റേഷനറി സാധനങ്ങളുമായി പോയിരുന്ന ട്രക്കുമായാണ് ബസ് കൂട്ടിയിടിച്ചത്. ബസിലെ ഡ്രൈവര് ഉറങ്ങിപ്പോയതാണ് അപകടത്തിന് കാരണമെന്നാണ് സംശയിക്കുന്നത്. അപകടത്തില് പരിക്കേറ്റവരില് പലരും ഗുരുതരാവസ്ഥയിലാണ്.
സംഭവത്തില് രാഷ്ട്രപതി ദ്രൗപദി മുര്മു അനുശോചനം രേഖപ്പെടുത്തി. പരിക്കേറ്റവര് എത്രയും പെട്ടന്ന് സുഖം പ്രാപിക്കട്ടെയെന്നും അവര് എക്സിലൂടെ അറിയിച്ചു.
