പത്തനംതിട്ട: പെരുമഴക്കാലത്ത് ശ്രദ്ധേയമായി പത്തനംതിട്ട ജില്ലാ കളക്ടര്‍ എസ്. പ്രേംകൃഷ്ണന്റെ സോഷ്യല്‍ മീഡിയ ഇടപെടലുകള്‍. കളക്ടറുടെ ഔദ്യോഗിക ഫെയ്‌സ്ബുക്ക് പേജില്‍ മഴ മുന്നറിയിപ്പുമായി ബന്ധപ്പെട്ട് വന്ന പോസ്റ്റാണ് ഇന്നലെ സോഷ്യല്‍ മീഡിയയില്‍ ശ്രദ്ധേയമായത്. മഴക്കെടുതി മൂലം പൊതു അവധി പ്രഖ്യാപിച്ചത് മാത്രമല്ല അവധി ദിനത്തില്‍ ട്യൂഷന്‍ സെന്ററുകള്‍ തുറക്കാന്‍ ശ്രമിച്ചവര്‍ക്കെതിരെ കര്‍ശന നിലപാട് എടുത്തതും വിദ്യാര്‍ത്ഥികളുടെ പ്രിയ താരമായി കളക്ടറെ മാറ്റി.
‘ഗ്രീന്‍ ആണ് മക്കളേ, ഹോം വര്‍ക്ക് ഒക്കെ ചെയ്‌തോളൂ, ബാഗ് പാക്ക് ചെയ്‌തോളു…’ എന്നാണ് കളക്ടറുടെ ശ്രദ്ധേയമായ കമന്റ്.
ഉരുളയ്‌ക്ക് ഉപ്പേരി പോലെ മറുപടികളും വന്നതോടെ സംഭവം രസമായി. ‘നന്നായി മക്കളോട് മാമന്റെ ഉപദേശം.’ ‘പ്ലീസ് സാര്‍, ഒരു അവധി താ.’ ‘നാളെ തന്നില്ലെങ്കിലും ശനിയാഴ്ച അവധി തരുമോ’… ഇങ്ങനെ പോകുന്നു മറുപടിക്കമന്റുകള്‍. കേരളത്തിലെ മിക്ക കളക്ടര്‍മാരും സോഷ്യല്‍ മീഡിയ ഇടപെലുകളിലൂടെ ശ്രദ്ധ പിടിച്ചുപറ്റാറുണ്ട്.
കളക്ടര്‍ പ്രേം കൃഷ്ണനും ഇപ്പോള്‍ പത്തനംതിട്ടയിലെ ട്രെന്‍ഡ് സെറ്ററായി മാറുകയാണ്. ലോക്‌സഭ തെരഞ്ഞെടുപ്പ് കാലത്തെ മികച്ച പ്രവര്‍ത്തനത്തിന് ഇലക്ഷന്‍ കമ്മിഷന്റെ അഭിനന്ദനവും കളക്ടര്‍ നേടിയിരുന്നു.
അവധി എന്ന് കേട്ടാല്‍ മടിപിടിക്കുന്ന കുട്ടികളുടെ മനസില്‍ രസം നിറയ്‌ക്കുന്നതാണ് കളക്ടറുടെ ഫെയ്‌സ്ബുക്ക് കമന്റ് എന്നാണ് പലരും വിലയിരുത്തുന്നത്. സോഷ്യല്‍ മീഡിയയില്‍ കളക്ടര്‍ക്ക് കുട്ടികള്‍ എന്ത് പേരിട്ടാവും സ്‌നേഹം പ്രകടപ്പിക്കുകയെന്ന് കൗതുകത്തോടെ കാത്തിരിക്കുകയാണ് പത്തനംതിട്ടക്കാര്‍.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: