ഹൈദരാബാദ്: തെലങ്കാനയില്‍ അയല്‍വാസിയുടെ പറമ്പില്‍ നിന്നും മാതള നാരങ്ങ പറിച്ചതിന് കൗമാരക്കാരനായ ദളിത് ബാലനെ കെട്ടിയിട്ടു മര്‍ദിച്ചു. ഷാബാദിലെ കേസാരം ഗ്രാമത്തിലാണ് സംഭവം.14കാരനാണ് മര്‍ദനമേറ്റത്. വിരമിച്ച പ്രധാനാധ്യാപകന്‍ മധുസൂദന്‍ റെഡ്ഡിയുടെ ഉടമസ്ഥതയിലുള്ള തോട്ടത്തില്‍ നിന്ന് മാതളം പറിക്കുന്നതിനിടെയാണ് കുട്ടി പിടിയിലായത്.
കുട്ടിയുടെ മാതാപിതാക്കളുടെ പരാതിയില്‍, ഷബാദ് പോലീസ് റെഡ്ഡിക്കെതിരെ ആക്രമണത്തിനും ജുവനൈല്‍ ജസ്റ്റിസ് ആക്ട് പ്രകാരവും എസ്‌സി, എസ്ടികള്‍ക്കെതിരായ അതിക്രമങ്ങള്‍ തടയല്‍ നിയമത്തിലെ വകുപ്പുകള്‍ പ്രകാരവും കേസെടുത്ത് അന്വേഷണം ആരംഭിച്ചു.
ശനിയാഴ്ച സ്‌കൂളില്‍ പോകാതെ കുട്ടി സുഹൃത്തുക്കളോടൊപ്പം കളിക്കാന്‍ പോയിരുന്നു. കളിക്കുന്നതിനിടയില്‍ മാതളനാരങ്ങ പറിക്കാനായി കുട്ടി റെഡ്ഡിയുടെ പറമ്പിലെത്തി. ഇതിനിടെ റെഡ്ഡി കുട്ടിയെ കൈയോടെ പിടികൂടി. തുടര്‍ന്ന് കൈകൾ കെട്ടിയിട്ട് വടികൊണ്ട് അടിച്ചു. പിന്നീട് കുട്ടിയെ വിട്ടയച്ചു. സംഭവമറിഞ്ഞ് ഇതേപ്പറ്റി ചോദിക്കാന്‍ ചെന്ന കുട്ടിയുടെ അമ്മയെയും ഇയാളും മകനും ചേര്‍ന്ന് ക്രൂരമായി മര്‍ദിച്ചെന്നും പരാതിയില്‍ ആരോപിക്കുന്നു.
ജൂൺ 22 ന് നടന്ന സംഭവത്തിന്റെ ചിത്രങ്ങൾ ഇന്നലെയാണ് സമൂഹമാധ്യമങ്ങളിലൂടെ പുറത്ത് വന്നത്.
പ്രതികരിക്കാൻ ഇവിടെ എഴുതുക: