പെരുമ്പാവൂർ : ലഹരിയെ ക്ലീൻ ബൗൾഡ് ആക്കാൻ റൂറൽ ജില്ലാ പോലീസ്. ട്വന്റി ട്വന്റി മാതൃകയിലുള്ള ഡിഐജി കപ്പ് ക്രിക്കറ്റ് കാർണിവെലിന്റെ പ്രാഥമിക മത്സരങ്ങൾ പൂർത്തിയായി.
അഞ്ച് സബ് ഡിവിഷനുകളിലായി മുപ്പത്തിനാല് ടീമുകളാണ് മത്സരിച്ചത്. ആലുവ വെസ്റ്റ് (ആലുവ സബ് ഡിവിഷൻ ), കുന്നത്തുനാട് ( പെരുമ്പാവൂർ ), ഊന്നുകൽ (മൂവാറ്റുപുഴ), വരാപ്പുഴ (മുനമ്പം ), പുത്തൻ കുരിശ് ( പുത്തൻകുരിശ്) എന്നീ പോലീസ്‌സ്റ്റേഷനുകളാണ് സബ് ഡിവിഷൻ ജേതാക്കളായത്. ഇവർ 24, 25, 26 തീയതികളിൽ ആലുവയിൽ നടക്കുന്ന രണ്ടാംഘട്ട മത്സരത്തിൽ കളിക്കും.
മീഡിയ ക്ലബ്ബ് ആലുവ, ഇൻകം ടാക്സ്, ആദിശങ്കര എഞ്ചിനീയറിംഗ് കോളേജ്, രാജഗിരി ഹോസ്പിറ്റൽ, കോസ്റ്റൽ വാരിയേഴ്സ്, റവന്യൂ എറണാകുളം, എക്സൈസ് എറണാകുളം ഇലവൻ, ഡോക്ടേഴ്സ് എറണാകുളം, ഫോറസ്റ്റ് തുടങ്ങിയ ടീമുകൾ രണ്ടാം ഘട്ടത്തിൽ പോലീസ് ടീമുകളായി ഏറ്റുമുട്ടും.
പോലീസും പബ്ലിക്കും ഉൾപ്പെടുന്നതാണ് പോലീസ് ടീം. പെരുമ്പാവൂർ സബ്ഡിവിഷനിൽ ഇന്ത്യൻ താരം ബേസിൽ തമ്പി ഉൾപ്പടെയുള്ളവർ കളിക്കുന്നുണ്ട്. 24 ന് രാവിലെ 10 ന് ആലുവ തുരുത്ത് ഗോട്ട് ക്ലബ്ബ് ഇൻഡോർ സ്റ്റേഡിയത്തിൽ ഡി ഐ ജി കപ്പ് രണ്ടാം ഘട്ട മത്സരം ആരംഭിയ്‌ക്കും.
കളിക്കാർ ലഹരി വിരുദ്ധ പ്രതിജ്ഞയെടുക്കും. ലഹരിക്കെതിരെ ബോധവൽക്കരണവും കൂട്ടായ്‌മയുമാണ് ലക്ഷ്യമിടുന്നതെന്ന് ജില്ലാ പോലീസ് മേധാവി വൈഭവ് സക്സേന പറഞ്ഞു.
