കൊച്ചി: സംസ്ഥാനത്ത് കാലവര്‍ഷം ശക്തമായി. ഇന്ന് മലപ്പുറം ഉള്‍പ്പെടെയുള്ള വടക്കന്‍ ജില്ലകളില്‍ മഴ കനത്തു. ഉച്ചയോടെ മലപ്പുറത്ത് റെഡ് അലര്‍ട്ട് പ്രഖ്യാപിച്ചിരുന്നു. ഇന്ന് എല്ലാ ജില്ലകളിലും ശക്തമായ മഴയ്‌ക്ക് സാധ്യതയുണ്ട്.
മൂന്ന് ജില്ലകളില്‍ അതി തീവ്രമഴയുണ്ടായേക്കും. ഇന്ന് കോഴിക്കോട്, കണ്ണൂര്‍, വയനാട് ജില്ലകളില്‍ റെഡ് അലര്‍ട്ടും കാസര്‍കോട്, മലപ്പുറം, പാലക്കാട്, തൃശൂര്‍, ഇടുക്കി, എറണാകുളം എന്നിവിടങ്ങളില്‍ ഓറഞ്ച് അലര്‍ട്ടും കോട്ടയം, ആലപ്പുഴ, പത്തനംതിട്ട, തിരുവനന്തപുരം, കൊല്ലം ജില്ലകളില്‍ യെല്ലോ അലര്‍ട്ടും പ്രഖ്യാപിച്ചിട്ടുണ്ട്. നാളെയും മറ്റന്നാളും മൂന്ന് ജില്ലകളില്‍ ഓറഞ്ച് അലര്‍ട്ടുണ്ട്.
അറബിക്കടലില്‍ വലിയ മേഘക്കൂട്ടങ്ങളുണ്ടെങ്കിലും കാറ്റിന്റെ ശക്തിയില്‍ ഏറ്റക്കുറച്ചില്‍ ഉണ്ടാകുന്നതാണ് തുടര്‍ച്ചയായി മഴ ശക്തമാകാത്തതിന് പ്രധാനകാരണം. കേരളത്തിന്റെ അഞ്ചിരട്ടി വലിപ്പമുള്ള മേഘങ്ങളാണ് കരകയറാനായി കടലില്‍ തുടരുന്നത്. ഇവ കടലില്‍ പെയ്ത് പോകുമെന്ന പ്രതീക്ഷയിലാണ് കാലാവസ്ഥ നിരീക്ഷകര്‍.
അതേസമയം അറബിക്കടലിന്റെ തീരത്ത് തെക്കന്‍ മഹാരാഷ്‌ട്ര മുതല്‍ വടക്കന്‍ കേരളം വരെ ന്യൂനമര്‍ദപാത്തി തുടരുകയാണ്. ഇതിനൊപ്പം ഒഡീഷയിലും ഛത്തിസ്ഗഡിലും തെക്കുകിഴക്കന്‍ ബംഗാള്‍ ഉള്‍ക്കടലിന്റെ കിഴക്കന്‍ മധ്യമേഖലയിലുമായി രണ്ട് അന്തരീക്ഷച്ചുഴികള്‍ തുടരുകയാണ്. ഇവയാണ് സംസ്ഥാനത്ത് മഴ ശക്തമാകാന്‍ കാരണം. താഴ്ന്ന നിലയിലുള്ള കാറ്റ് 3 ദിവസം കൂടി പടിഞ്ഞാറന്‍ തീരമേഖലയില്‍ ശക്തമായി തുടരും. ഇന്നലെ രാവിലെ അവസാനിച്ച 24 മണിക്കൂറിനിടെ ഏറ്റവും കൂടുതല്‍ മഴ ലഭിച്ചത് മലപ്പുറത്തെ അങ്ങാടിപ്പുറത്താണ്, 8 സെ.മീ. മഴ ഇവിടെ ലഭിച്ചു.
അതേ സമയം വേലിയേറ്റം മൂലം തീരത്ത് തിരമാല ഉയരാന്‍ സാധ്യതയുണ്ട്. കേരള തീരത്ത് മോശം കാലാവസ്ഥയ്‌ക്കും 55 കി.മീ. വരെ വേഗത്തിലുള്ള കാറ്റിനും സാധ്യതയുള്ളതിനാല്‍ മത്സ്യബന്ധനത്തിന് പോകുന്നതിന് 26 വരെ വിലക്കുണ്ട്.
പ്രതികരിക്കാൻ ഇവിടെ എഴുതുക: