കോഴിക്കോട്: കൂടരഞ്ഞി കുളിരാമുട്ടിയില്‍ പിക്കപ്പ് വാന്‍ കടയിലേക്ക് ഇടിച്ചുകയറി മൂന്നുപേര്‍ കൊല്ലപ്പെട്ടു. വാഹനത്തിന്റെ ക്ലീനര്‍ തേക്കുംകുറ്റി സ്വദേശി മുഹമ്മദ് റാഫി (36), കുളിരാമുട്ടി സ്വദേശികളായ പുളിക്കുന്നത്ത് സുന്ദരന്‍ (62), കമുങ്ങുംതോട്ടത്തില്‍ ജോണ്‍ (65) എന്നിവരാണ് മരിച്ചത്.
മുഹമ്മദ് റഫി മണാശ്ശേരിയിലെ സ്വകാര്യ മെഡിക്കല്‍ കോളജ് ആശുപത്രിയില്‍ ചികിത്സയിലിരിക്കെയാണ് മരിച്ചത്. മറ്റു രണ്ടുപേരും ആശുപത്രിയില്‍ എത്തുമ്പോഴേക്കും മരണപ്പെട്ടിരുന്നു. വാഹനത്തിന്റെ ഡ്രൈവര്‍ തേക്കുംകുറ്റി സ്വദേശി ശിഹാബുദ്ദീന്‍, വ്യാപാര സ്ഥാപന ഉടമ ജോമോന്‍ എന്നിവര്‍ ചികിത്സയിലാണ്.
ഇന്നലെ രാവിലെ ഒന്‍പതോടെയാണ് അപകടം. പൂവാറന്‍തോടില്‍നിന്ന് കൂടരഞ്ഞിഭാഗത്തേക്ക് വളവുമായി വന്ന പിക്കപ്പ്‌വാന്‍ നിയന്ത്രണം വിട്ട് കടയിലേക്ക് പാഞ്ഞുകയറി മറിയുകയായിരുന്നു. ഇടിയുടെ ആഘാതത്തില്‍ കടയും വാഹനവും സമീപത്തുള്ള ഇലക്ട്രിക് പോസ്റ്റും തകര്‍ന്നു. കടയുടെ സമീപത്ത് സംസാരിച്ചുകൊണ്ടിരിക്കുകയായിരുന്നു സുന്ദരനും ജോണും. പ്രേമയാണ് സുന്ദരന്റെ ഭാര്യ. മക്കള്‍: അമൃത, ആതിര. ജോണിന്റെ ഭാര്യ ലില്ലി കിഴക്കെ പറമ്പില്‍. മക്കള്‍: പ്രിയ (യുകെ.), പ്രജീഷ് (ഇറ്റലി). മുഹമ്മദ് റാഫിയുടെ ഭാര്യ ശൈലത് ബാനു. മക്കള്‍: ഹസ ഫാത്തിമ, ആഷ്മി.
പ്രതികരിക്കാൻ ഇവിടെ എഴുതുക: