തിരുവനന്തപുരം: സാമൂഹ്യവിരുദ്ധരുമായി ബന്ധമുളള പൊലീസ് ഉദ്യോഗസ്ഥര്ക്കെതിരെ കര്ശന നിയമനടപടി സ്വീകരിക്കണമെന്ന് നിര്ദ്ദേശിച്ച് സംസ്ഥാന പൊലീസ് മേധാവി ഡോ. ഷെയ്ഖ് ദര്വേഷ് സാഹിബ്. ഇവരെ സര്വീസില് നിന്ന് പിരിച്ചു വിടാന് നടപടി വേണം. പൊലീസ് ആസ്ഥാനത്ത് ക്രൈം റിവ്യൂ സമ്മേളനത്തിലാണ് പൊലീസ് മേധാവിയുടെ അദ്ദേഹം.
അടുത്ത മാസം നിലവില് വരുന്ന പുതിയ നിയമ സംഹിതകളെക്കുറിച്ച് ജില്ലാ പൊലീസ് മേധാവിമാര് ഉള്പ്പെടെ 38,000ല് പരം പൊലീസ് ഉദ്യോഗസ്ഥര്ക്ക് പരിശീലനം നല്കി. ബാക്കിയുള്ളവര്ക്ക് ഉടന് പരിശീലനം നല്കുമെന്നും ഷേഖ് ദര്വേഷ് സാഹിബ് പറഞ്ഞു. ഓണ്ലൈന് തട്ടിപ്പുകള് വര്ധിച്ചുവരുന്നതിന് തടയിടാന് ജില്ലാ പൊലീസ് മേധാവിമാര് വ്യാപക പ്രചരണം നടത്തണം. ജനമൈത്രി പൊലീസ് സേവനം ഇതിനായി പ്രയോജനപ്പെടുത്തണം. പൊലീസ് ഉദ്യോഗസ്ഥര്ക്കെതിരെയുള്ള ശിക്ഷാ നടപടികള് നിശ്ചിത സമയത്തിനകം പൂര്ത്തിയാക്കാന് പ്രത്യേക ശ്രദ്ധ വേണം.
സ്ത്രീകള്ക്കും കുട്ടികള്ക്കുമെതിരെയുള്ള അതിക്രമങ്ങള് തടയണം. ഇത്തരം കേസുകളില് പ്രതികളെ അറസ്റ്റ് ചെയ്യുന്നതിന് ജില്ലാ പൊലീസ് മേധാവിമാര് കര്ശന നടപടി എടുക്കണം. കുട്ടികളെയും സ്ത്രീകളെയും കാണാതാകുന്ന കേസുകളില് അന്വേഷണം ഊര്ജിതമാക്കണം. മോഷണവും വ്യക്തികള്ക്കെതിരെയുള്ള അതിക്രമവും തടയാനാകണം. ഇത്തരം കേസുകളില് കുറ്റവാളികളെ പിടികൂടുന്നതില് ജാഗ്രത കാട്ടണമെന്നും പൊലീസ് മേധാവി നിര്ദ്ദേശിച്ചു.
പോക്സോ കേസുകളുടെ നിലവിലെ സ്ഥിതിയും യോഗം വിലയിരുത്തി. കാപ്പനിയമം ഉള്പ്പെടെ വിവിധ വകുപ്പുകള് പ്രകാരം സ്വീകരിച്ച നപടികളും ചര്ച്ച ചെയ്തു. ലോക്സഭാ തിരഞ്ഞെടുപ്പ് സമാധാനപരമായി നടത്തുന്നതില് പങ്കു വഹിച്ച വിവിധ റാങ്കുകളിലെ പൊലീസ് ഉദ്യോഗസ്ഥരെ പൊലീസ് മേധാവി അഭിനന്ദിച്ചു. എ.ഡി.ജി.പിമാരായ മനോജ് എബ്രഹാം, എം.ആര്. അജിത് കുമാര്, എച്ച്. വെങ്കടേഷ് എന്നിവരും ഐ.ജിമാര്, ഡി.ഐ.ജി മാര്, എസ് പി മാര്, ജില്ലാ പൊലീസ് മേധാവിമാര്, എ.ഐ.ജിമാര് എന്നിവരും യോഗത്തില് സംബന്ധിച്ചു.
