തിരുവനന്തപുരം: അമേരിക്കയിലേക്കുള്ള കുടിയേറ്റത്തെ കുറിച്ച് കൃത്യമായ ധാരണ സൃഷ്ടിക്കുന്നതിന് സംസ്ഥാന സര്ക്കാര് ശ്രമിക്കണമെന്ന് ലോക കേരള സഭ പ്രതിനിധികള് അഭിപ്രായപ്പെട്ടു. അമേരിക്കയുമായി ബന്ധപ്പെട്ട മേഖലാ ചര്ച്ചയിലാണ് ഈ നിര്ദേശം. പല തരത്തിലുള്ള വിദ്യാഭ്യാസ തൊഴില് തട്ടിപ്പുകള്ക്കും വ്യക്തികള് ഇരയാകുന്ന സാഹചര്യം ഇതിലൂടെ ഇല്ലാതാക്കാം. ഗാര്ഹിക മേഖലയില് പണിയെടുക്കാനെത്തുന്ന സ്ത്രീകളുടെ പ്രശ്നങ്ങളെ ഗൗരവകരമായി കാണണം. മലയാള ഭാഷയെ പ്രചരിപ്പിക്കുന്നതിനാവശ്യമായ നടപടികളിലൂടെ മാത്രമേ കേരളവുമായുള്ള ബന്ധം പുതു തലമുറക്ക് നിലനിര്ത്താന് കഴിയൂ. നോര്ക്ക മാതൃകയില് അമേരിക്കന് മലയാളികള്ക്ക് പ്രത്യേക ഹെല്പ്പ് ഡസ്ക് എന്ന ആശയവും സര്ക്കാര് പരിഗണിക്കണമെന്ന് പ്രതിനിധികള് നിര്ദേശിച്ചു. ഇ.ടി ടൈസണ് എംഎല്എ അധ്യക്ഷത വഹിച്ചു.
