ഇംഫാല്‍: മണിപ്പൂര്‍ മുഖ്യമന്ത്രി എന്‍. ബിരേന്‍ സിങ്ങിന്റെ വാഹനവ്യൂഹത്തിന് നേരെ ഭീകരാക്രമണം. കാങ്‌പോക്പി ജില്ലയില്‍ ഭീകരര്‍ നടത്തിയ ആക്രമണത്തില്‍ ഒരു പോലീസുകാരന് പരിക്കേറ്റു. ഇംഫാലില്‍ നിന്ന് ജിരിബാം ജില്ലയിലേക്ക് വാഹനവ്യൂഹം ദേശീയ പാത 37 ലൂടെ കടന്നുപോയപ്പോഴാണ് രാവിലെ 10.30 ഓടെ ആക്രമണത്തിന് ഇരയായതെന്നാണ് മുഖ്യമന്ത്രിയുടെ ഓഫീസ് പറയുന്നത്. ബിഷ്ണുപൂര്‍ ജില്ലയില്‍ നിന്നുള്ള അജേഷ് എന്ന പോലീസുകാരനാണ് വെടിയേറ്റത്. വലത് കൈയിലാണ് ബുള്ളറ്റ് തുളഞ്ഞ് കയറിയത്. ഇയാളെ ഇംഫാലിലെ ആശുപത്രിയില്‍ പ്രവേശിപ്പിച്ചു.
അജ്ഞാതരായ അക്രമികള്‍ ഒരാളെ കൊലപ്പെടുത്തിയതിനെത്തുടര്‍ന്ന് കഴിഞ്ഞ കുറച്ച് ദിവസങ്ങളായി സംഘര്‍ഷാവസ്ഥ നിലനില്‍ക്കുന്ന ജിരിബാം സന്ദര്‍ശിക്കാന്‍ മുഖ്യമന്ത്രി പദ്ധതിയിട്ടിരുന്നു. ചൊവ്വാഴ്ച പ്രദേശം സന്ദര്‍ശിക്കാനൊരുങ്ങുകയായിരുന്നു ബിരേന്‍ സിങ്. ജിരിബാമിലെ കൊലപാതകത്തിന് പുറമെ ഏതാനും സര്‍ക്കാര്‍ ഓഫീസുകള്‍ ഉള്‍പ്പെടെ 70 ഓളം വീടുകള്‍ അഗ്‌നിക്കിരയാക്കുകയും നൂറുകണക്കിനാളുകള്‍ പ്രദേശത്ത് നിന്ന് പലായനം ചെയ്യുകയും ചെയ്തിരുന്നു.
പ്രതികരിക്കാൻ ഇവിടെ എഴുതുക: