ഓസ് ലോ: നോര്വ്വെ ചെസ്സില് പ്രജ്ഞാനന്ദയുടെ സഹോദരി ആര്.വൈശാലി ഒന്നാം സ്ഥാനത്ത്. നാലാം റൗണ്ടില് വൈശാലി സ്വീഡന്റെ പിയ ക്രാംലിങ്ങിനെ ക്ലാസിക്കല് ഗെയിമില് തോല്പിച്ചതോടെ വൈശാലി ഏറെ മുന്നേറി. നാല് റൗണ്ടുകള് പിന്നിട്ടപ്പോള് വൈശാലിക്ക് എട്ടര പോയിന്റുണ്ട്.
ഈയിടെ സമാപിച്ച കാന്ഡിഡേറ്റ്സ് ചെസ്സില് മികച്ച താരങ്ങളെ തോല്പിച്ച് തുടര്ച്ചയായ ജയങ്ങള് നേടി തിരിച്ചുവരവ് നടത്തിയ വൈശാലി ഇപ്പോള് അപാരഫോമിലാണ്. മെയ് ഒന്നിനാണ് വൈശാലിയെ ഔദ്യോഗികമായി ഗ്രാന്റ് മാസ്റ്റര് ആയി അംഗീകരിച്ചത്. 2023ല് സ്പെയിനില് നടന്ന ലോബ്രെഗാട് ഓപ്പണ് ചെസ് ടൂര്ണ്ണമെന്റില് വൈശാലി ഗ്രാന്റ് മാസ്റ്റര് പദവി ലഭിക്കുന്നതിനുള്ള 2500 ഇഎല്ഒ പോയിന്റുകള് പൂര്ത്തിയാക്കിയിരുന്നു.
ഇപ്പോഴത്തെ ലോക ചാമ്പ്യന്കൂടിയായ ചൈനയുടെ വെഞ്ചുന്ജുവിന് ആറ് പോയിന്റുണ്ട്. ഉക്രൈന്റെ അന്ന മ്യൂസിചുകിനും ആറ് പോയിന്റാണ്. ചൈനയുടെ ടിംങ് ജെ ലെയ്ക്ക് അഞ്ച് പോയിന്റാണ്. ഇന്ത്യയുടെ കൊനേരു ഹംപിയ്ക്കും പിയ ക്രാംലിങ്ങിനും മൂന്ന് പോയിന്റുകള് വീതമാണ്.
