കൊച്ചി: പോലീസ് സ്റ്റേഷനുകളിലെ ഭീകരാന്തരീക്ഷം അവസാനിപ്പിക്കണമെന്നും ഭയം ജനിപ്പിക്കരുതെന്നും പൊതു ഓഫീസുകള്‍ എന്ന നിലയില്‍ സ്ത്രികളും കുട്ടികളുമുള്‍പ്പെടെയുള്ള പൊതുജനങ്ങളെ സ്വാഗതം ചെയ്യണമെന്നും ഹൈക്കോടതി ആവശ്യപ്പെട്ടു.
അഭിഭാഷകനെ അധിക്ഷേപിച്ച സംഭവത്തില്‍ പാലക്കാട് ആലത്തൂര്‍ പോലീസ് സ്റ്റേഷന്‍ മുന്‍ സബ് ഇന്‍സ്‌പെക്ടര്‍ വി.ആര്‍. റനീഷിനെതിരായ കോടതിയലക്ഷ്യ ഹര്‍ജി പരിഗണിക്കവെയാണ് ജസ്റ്റിസ് ദേവന്‍ രാമചന്ദ്രന്‍ ഇക്കാര്യം വ്യക്തമാക്കിയത്.
ഉദ്യോഗസ്ഥനില്‍ നിന്ന് അപമാനം നേരിട്ട പിഎസ് അക്വിബ് സൊഹൈല്‍ നല്കിയ ഹര്‍ജിയില്‍ വി.ആര്‍. റനീഷിനെതിരായ അന്വേഷണത്തിന്റെ തല്‍സ്ഥിതി റിപ്പോര്‍ട്ട് സംസ്ഥാന പോലീസ് മേധാവിയോട് ബെഞ്ച് തേടി.
ആലത്തൂര്‍ പോലീസ് സ്റ്റേഷനില്‍ സൊഹൈലിനോട് രനീഷ് അസഭ്യം പറഞ്ഞ സംഭവത്തെ തുടര്‍ന്നാണ് കേസ്. സംസ്ഥാനത്തെ പോലീസ് ഉദ്യോഗസ്ഥര്‍ പരിഷ്‌കൃതമായി പെരുമാറണമെന്ന ഹൈക്കോടതിയുടെ നിര്‍ദേശം നഗ്‌നമായി ലംഘിക്കുന്നതാണ് പോലീസ് ഉദ്യോഗസ്ഥന്റെ പെരുമാറ്റമെന്ന് ഹര്‍ജിക്കാരന്‍ വാദിച്ചു.
അതേ ഉദ്യോഗസ്ഥനെതിരെയുള്ള മറ്റൊരു കോടതിയലക്ഷ്യ ഹര്‍ജി പരിഗണിക്കവെ, സംഭവസമയത്ത് ഹര്‍ജിക്കാരന്റെ മകന്‍ പകര്‍ത്തിയ വീഡിയോ ഡ്യൂട്ടി നിര്‍വഹണത്തെ തടസപ്പെടുത്തിയെന്ന് അവകാശപ്പെട്ട അദ്ദേഹത്തിന്റെ സത്യവാങ്മൂലത്തെ ബെഞ്ച് വിമര്‍ശിച്ചു.
വീഡിയോ റെക്കോര്‍ഡ് ചെയ്യുന്നത് ഡ്യൂട്ടി തടസപ്പെടുത്തുന്നതായി ഒരു പോലീസ് ഉദ്യോഗസ്ഥന്‍ വിശ്വസിക്കുന്നുവെങ്കില്‍, ‘അവനെ സ്‌കൂളിലേക്ക് തിരിച്ചയക്കണമെന്ന്’ ഹൈക്കോടതി അഭിപ്രായപ്പെട്ടു. മറ്റ് രാജ്യങ്ങളില്‍, പോലീസിന്റെ ഓരോ പ്രവര്‍ത്തനവും രേഖപ്പെടുത്തുന്നു. ഇത് എങ്ങനെയാണ് ഡ്യൂട്ടി നിര്‍വഹണത്തിന് തടസമാകുന്നത്? കോടതി ചോദിച്ചു.
പോലീസ് ഉദ്യോഗസ്ഥനെതിരെയുള്ള ആരോപണങ്ങളുടെ സത്യാവസ്ഥ പോലീസ് മേധാവി എപ്പോഴെങ്കിലും അന്വേഷിച്ചിട്ടുണ്ടോ എന്നും ഹൈക്കോടതി ചോദിച്ചു.
സംസ്ഥാന പോലീസ് മേധാവി ഒരു സര്‍ക്കുലര്‍ പുറപ്പെടുവിക്കുകയും ഉദ്യോഗസ്ഥര്‍ അത് അറിയുകയും ചെയ്തില്ലെങ്കില്‍, അദ്ദേഹത്തിന് എങ്ങനെ മേധാവിയായി തുടരാനാകും? അഹങ്കാരമല്ല, മാനവികതയാണ് പരിഷ്‌കൃത പോലീസ് സേനയുടെ മുഖമുദ്ര. പരിശോധന ഫലപ്രദമല്ലെങ്കില്‍ ഉദ്യോഗസ്ഥര്‍ ഇങ്ങനെയാണ് പെരുമാറിയത്.
മോശം ഭാഷ ആളുകളെ നിയന്ത്രിക്കുമെന്നോ ക്രമസമാധാനം നിലനിര്‍ത്തുമെന്നോ നിങ്ങള്‍ കരുതിയിരുന്നോ? കോടതി ചോദിച്ചു. ഹര്‍ജികള്‍ ഹൈക്കോടതി ജൂണ്‍ 11 ലേക്ക് മാറ്റി.
പ്രതികരിക്കാൻ ഇവിടെ എഴുതുക: