തിരുവനന്തപുരം: സംസ്ഥാനത്ത് ഇന്ന് തീവ്ര മഴയ്ക്ക് സാധ്യതയുള്ളതിനാല് നാലു ജില്ലകളില് ഓറഞ്ച് അലര്ട്ട് പ്രഖ്യാപിച്ചു. പത്തനംതിട്ട, ആലപ്പുഴ, കോട്ടയം, എറണാകുളം ജില്ലകളിലാണ് ഓറഞ്ച് അലര്ട്ട് പ്രഖ്യാപിച്ചത്. തിരുവനന്തപുരം, കൊല്ലം, ഇടുക്കി, തൃശൂര് ജില്ലകളില് യെല്ലോ അലര്ട്ടും പ്രഖ്യാപിച്ചു.
ഒറ്റപ്പെട്ട സ്ഥലങ്ങളില് ജൂണ് ഒന്നു വരെ ശക്തമായ മഴക്ക് സാധ്യതയുണ്ട്. തെക്കന് കേരളം, ലക്ഷദ്വീപ് തീരങ്ങളില് ശക്തമായ കാറ്റിനും ഉയര്ന്ന തിരമാലയ്ക്കും സാധ്യതയുള്ളതിനാല് മത്സ്യബന്ധനം പാടില്ലെന്ന് നിര്ദേശമുണ്ട്. കേരളത്തില് കാലവര്ഷം എത്തിയതായി ഔദ്യോഗിക സ്ഥിരീകരണം വന്നിട്ടില്ല. എന്നാല് ഇപ്പോള് ലഭിക്കുന്ന മഴ കാലവര്ഷത്തിന്റെ ഭാഗമാണെന്നാണ് കാലാവസ്ഥ വിദഗ്ധരുടെ അഭിപ്രായം. മൂന്നു ദിവസത്തിനകം കാലവര്ഷം കേരളത്തില് എത്തും എന്നാണ് കേന്ദ്ര കാലാവസ്ഥാ വകുപ്പിന്റെ അറിയിപ്പ്.
നിലവിൽ തെക്കൻ തമിഴ്നാട് തീരത്തിനു മുകളിലായി ചക്രവാതച്ചുഴി നിലനിൽക്കുന്നുണ്ട്. കേരളമടക്കമുള്ള സംസ്ഥാനത്ത് പൊതുവിൽ ഈ കാലവർഷത്തിൽ സാധാരണയിലും കനത്ത മഴ പെയ്യുമെന്നാണ് പ്രവചനം.
