ശ്രീനഗര്: ജമ്മുകശ്മീരിലെ ശ്രീനഗറിനും ബാരാമുള്ളയ്ക്കും പിന്നാലെ അനന്ത്നാഗ്-രജൗരി ലോക്സഭാ മണ്ഡലത്തിലും റിക്കാര്ഡ് പോളിങ്. രാത്രി 7.45 വരെയുള്ള കണക്കുകള് പ്രകാരം 52.28 ശതമാനമാണ് ഇവിടുത്തെ പോളിങ്. മുപ്പത്തഞ്ച് വര്ഷത്തിനിടയില് ആദ്യമായാണ് രജൗരിയില് പോളിങ് ശതമാനം ഇത്രയധികം ഉയരുന്നത്.
ശ്രീനഗറിലും (38.49%) ബാരാമുള്ളയിലും (59.1%) ഇത്തവണ റിക്കാര്ഡ് പോളിങ്ങാണ് രേഖപ്പെടുത്തിയത്. മൂന്ന് ലോക്സഭാ മണ്ഡലങ്ങളിലുമായി ശരാശരി 50% പോളിങ്ങാണ് രേഖപ്പെടുത്തിയത്. 2019ല് ഇത് 19.16 ശതമാനമായിരുന്നു. അനന്ത്നാഗ്-രജൗരി പോളിങ്ങിലും ജമ്മുവിലെ ജനങ്ങള് ജനാധിപത്യത്തില് വിശ്വാസമര്പ്പിച്ചിരിക്കുന്നുവെന്ന് തെളിയിച്ചിരിക്കുന്നുവെന്ന് രജൗരിയിലെ വോട്ടിങ് ശതമാനം പുറത്തു വിട്ടതിന് പിന്നാലെ കേന്ദ്ര തെരഞ്ഞെടുപ്പ് കമ്മിഷന് പറഞ്ഞു.
രജൗരിയില് 2338 പോളിങ് സ്റ്റേഷനികളിലാണ് വോട്ടെടുപ്പ് നടന്നത്. രാവിലെ ഏഴിന് തന്നെ വോട്ടെടുപ്പ് ആരംഭിച്ചു. മിക്കയിടങ്ങളും വോട്ടര്മാരുടെ നീണ്ട വരി പ്രത്യക്ഷമായിരുന്നു.
