കോട്ടയത്ത് ഭാര്യയുടെ കാമുകനെന്ന് സംശയിച്ച് യുവാവ് ബന്ധുവിനെ കൊലപ്പെടുത്തി; കൂടെയുണ്ടായിരുന്ന സുഹൃത്തിനും വെട്ടേറ്റു

കോട്ടയം: വടവാതൂരിൽ ഭാര്യയുടെ കാമുകനെന്ന് സംശയിച്ച് യുവാവ് ബന്ധുവിനെ വെട്ടിക്കൊലപ്പെടുത്തി. വണ്ടിപ്പെരിയാർ സ്വദേശിയായ അജീഷ് ആണ് ബന്ധുവായ ചെങ്ങളം സ്വദേശി രഞ്ജിത്തിനെ(40) കൊലപ്പെടുത്തിയത്. ആക്രമണത്തിൽ രഞ്ജിത്തിന്റെ സുഹൃത്തിനും പരിക്കേറ്റിട്ടുണ്ട്. അജീഷ് ഒളിവിലാണ്. ഇന്നലെ രാത്രി ഏഴര മണിയോടെയാണ് സംഭവം നടന്നത്.

വഴിയിൽ പതിയിരുന്ന അജീഷ് രഞ്ജിത്തിനെയും സുഹൃത്ത് റിജോയേയും വാക്കത്തി കൊണ്ട് ആക്രമിക്കുകയായിരുന്നു. സംഭവത്തിന് ശേഷം ഇയാൾ രക്ഷപ്പെടുകയായിരുന്നു. രഞ്ജിത്തും റിജോയും ജോലി കഴിഞ്ഞ് മടങ്ങിവരവേയാണ് അജീഷ് ആക്രമിച്ചത്. പ്രതിയെ പിടികൂടാൻ പോലീസ് അന്വേഷണം ആരംഭിച്ചു. അജീഷിന് ഭാര്യയെ സംശയമായിരുന്നുവെന്ന് പോലീസ് പറഞ്ഞു. നേരത്തെ അജീഷിന് എതിരെ ഭാര്യ പോലീസിൽ പരാതി നൽകിയിരുന്നു. ഇതിന് പിന്നാലെയാണ് യുവാവിനെ വെട്ടിക്കൊലപ്പെടുത്തിയത്.

ആദ്യ വെട്ടേറ്റത് റിജോയ്‌ക്കാണ്. വെട്ടേറ്റ റിജോ സമീപത്തെ സ്വകാര്യ ആശുപത്രിയിലേക്ക് ഓടിക്കയറി. തന്റെ കൂടെയുള്ള ഒരാള്‍ക്കും വെട്ടേറ്റിട്ടുണ്ടെന്ന് റിജോ ആശുപത്രിയിലുള്ളവരെ അറിയിച്ചു. അവിടെ നിന്ന് ആളുകളെത്തിയപ്പോള്‍ വെട്ടേറ്റ് രക്തത്തില്‍ കുളിച്ച് കിടക്കുന്ന രഞ്ജിത്തിനെയാണ് കണ്ടത്. തുടര്‍ന്ന് ആശുപത്രിയിലെത്തിച്ചെങ്കിലും വൈകാതെ രഞ്ജിത്ത് മരിച്ചു.