ലക്നൗ : യുപിയിലെ ഷാജഹാൻപൂരിൽ ഉണ്ടായ വാഹനാപകടത്തിൽ പൂർണഗിരി ക്ഷേത്രത്തിലേക്ക് പോവുകയായിരുന്ന 11 ഭക്തർ മരിക്കുകയും 10 പേർക്ക് ഗുരുതരമായി പരിക്കേൽക്കുകയും ചെയ്തു.
ഖുതാർ പോലീസ് സ്റ്റേഷനു കീഴിലുള്ള ഹാജിയാപൂരിൽ ശനിയാഴ്ച രാത്രി ക്ഷേത്രത്തിലേക്കുള്ള യാത്രാമധ്യേ റോഡരികിലെ റസ്റ്റോറൻ്റിൽ ബസ് നിർത്തുന്നതിനിടെയാണ് അപകടം നടന്നതെന്ന് പോലീസ് സൂപ്രണ്ട് അശോക് കുമാർ മീണ പറഞ്ഞു. സീതാപൂരിൽ നിന്നുള്ള ഭക്തർ ബസിനുള്ളിൽ കാത്തുനിന്നപ്പോൾ കരിങ്കല്ല് കയറ്റി വന്ന ഒരു ട്രക്ക് നിയന്ത്രണം വിട്ട് വാഹനത്തിന് മുകളിൽ മറിയുകയായിരുന്നു.
മുഖ്യമന്ത്രി യോഗി ആദിത്യനാഥ് മരിച്ചവരുടെ കുടുംബങ്ങളോട് അനുശോചനം രേഖപ്പെടുത്തുകയും പരിക്കേറ്റവർക്ക് ചികിത്സ ഉറപ്പാക്കാൻ ജില്ലാ ഭരണകൂടത്തിന് നിർദേശം നൽകുകയും ചെയ്തു.
