തിരുവനന്തപുരം: സംസ്ഥാന ഭക്ഷ്യ സുരക്ഷാ വകുപ്പ് കഴിഞ്ഞ സാമ്പത്തിക വര്ഷം 65,432 പരിശോധനകള് നടത്തിയതിലൂടെ എല്ലാ ജില്ലകളില് നിന്നായി 4,05,45,150 രൂപ പിഴയിനത്തില് ഈടാക്കിയതായി ആരോഗ്യവകുപ്പ്.
മുന് വര്ഷങ്ങളേക്കാള് റെക്കോര്ഡ് പരിശോധനകളാണ് കഴിഞ്ഞ വര്ഷം നടത്തിയത്. പിഴത്തുകയും ഇരട്ടിയായി. 10,466 സ്റ്റാറ്റിയൂട്ടറി സാമ്പിളുകള് വിവിധ സ്ക്വാഡുകളുടെ നേതൃത്വത്തില് ശേഖരിച്ചു. 37,763 സര്വൈലന്സ് സാമ്പിളുകളും പരിശോധനയ്ക്കെടുത്തു. കഴിഞ്ഞ വര്ഷം 982 അഡ്ജ്യൂഡിക്കേഷന് കേസുകളാണ് ഫയല് ചെയ്തത്.
ഷവര്മ്മ ഉത്പാദന വിതരണ കേന്ദ്രങ്ങളില് മാത്രം 6531 പരിശോധനകള് നടത്തി. നിയമലംഘനം കണ്ടെത്തിയ 2064 സ്ഥാപനങ്ങള്ക്ക് നോട്ടീസ് നല്കി 85,62,600 രൂപ പിഴ ഈടാക്കി. ഓപ്പറേഷന് മത്സ്യയിലൂടെ 5276 പരിശോധനകളാണ് നടത്തിയത്. മോശമായ 7212 കിലോ മത്സ്യം നശിപ്പിച്ചു. 2,58,000 രൂപ വിവിധ കാരണങ്ങളാല് പിഴ ഈടാക്കി. ഭക്ഷണ പാക്കറ്റുകളില് ലേബല് പതിക്കുന്നത് നിര്ബന്ധമാക്കുകയും ഇത് ഉറപ്പു വരുത്തുന്നതിനായി നടത്തിയ ഓപ്പറേഷന് ലേബലില് 791 പരിശോധനകള് നടത്തി. ഇതുമായി 122 കേസുകള് ഫയല് ചെയ്തു.
