ന്യൂഡല്ഹി: 2024ലെ പൊതുതെരഞ്ഞെടുപ്പ് പ്രഖ്യാപിച്ചതിന് ശേഷം, 2024 മെയ് 15 വരെ 4.24 ലക്ഷത്തിലധികം പരാതികള് സി-വിജില് ആപ്ലിക്കേഷന് വഴി ലഭിച്ചതായി കേന്ദ്ര തെരഞ്ഞെടുപ്പു കമ്മിഷന്. ഇതില് 4,23,908 പരാതികള് തീര്പ്പാക്കി. ശേഷിക്കുന്ന 409 കേസുകളില് നടപടി പുരോഗമിക്കുന്നു. ഏകദേശം, 89% പരാതികളും 100 മിനിറ്റിനുള്ളില് പരിഹരിച്ചു. 2024ലെ ലോക്സഭാ തെരഞ്ഞെടുപ്പില്, പെരുമാറ്റച്ചട്ട ലംഘനങ്ങള് അറിയിക്കാനായി ഇന്ത്യന് തെരഞ്ഞെടുപ്പ് കമ്മീഷന് രൂപ കല്പ്പന ചെയ്തതാണ് സി-വിജില് ആപ്ലിക്കേഷന്.
നിര്ദ്ദിഷ്ട സമയത്തിനും ശബ്ദപരിധിക്കും അപ്പുറമുള്ള ഉച്ചഭാഷിണികളുടെ ഉപയോഗം, നിരോധന കാലയളവിലെ പ്രചാരണം, അനുമതിയില്ലാതെ ബാനറുകളോ പോസ്റ്ററുകളോ സ്ഥാപിക്കല്, അനുവദനീയമായ പരിധിക്കപ്പുറമുള്ള വാഹനവിന്യാസം, സ്വത്ത് നശിപ്പിക്കല്, തോക്കുകള് പ്രദര്ശിപ്പിക്കല്, / ഭീഷണിപ്പെടുത്തല്, സ്വാധീനിക്കാനുള്ള ശ്രമങ്ങള് എന്നിവയ്ക്കായി വോട്ടര്മാര് ഈ ആപ്ലിക്കേഷന് ഉപയോഗിച്ചു. വോട്ടര്മാരെ ജില്ലാ കണ്ട്രോള് റൂം, റിട്ടേണിങ് ഓഫീസര്, ഫ്ളൈയിംഗ് സ്ക്വാഡ് ടീമുകള് എന്നിവയുമായി കൂട്ടിയിണക്കുന്ന എളുപ്പത്തില് പ്രവര്ത്തിപ്പിക്കാവുന്ന ആപ്ലിക്കേഷനാണ് സി-വിജില്. പരാതി അയച്ചാലുടന് പരാതിക്കാരന് പ്രത്യേക ഐഡി ലഭിക്കും. അതിലൂടെ പരാതിക്കാരന് അവരുടെ മൊബൈലില് പരാതിയുടെ നില പരിശോധിക്കാന് കഴിയും.
ഉപയോക്താക്കള്ക്ക് ശബ്ദമോ ചിത്രങ്ങളോ അല്ലെങ്കില് വീഡിയോയോ തത്സമയം പകര്ത്താനാകും. പരാതികളോട് സമയബന്ധിതമായി പ്രതികരിക്കുന്നതിന് ‘100 മിനിറ്റ്’ കൗണ്ട്ഡൗണ് സി-വിജില് ഉറപ്പാക്കുകയും ചെയ്യുന്നു. ലംഘനം റിപ്പോര്ട്ട് ചെയ്യുന്നതിന് ഉപയോക്താവ് സി-വിജിലിലെ ക്യാമറ ഓണാക്കിയാലുടന് ആപ്ലിക്കേഷന് സ്വയമേവ ജിയോ-ടാഗിങ് പ്രവര്ത്തനക്ഷമമാക്കും. അതിലൂടെ ഫ്ളൈയിംഗ് സ്ക്വാഡുകള്ക്ക് ലംഘനം നടന്ന കൃത്യമായ സ്ഥാനം അറിയാന് കഴിയും. കൂടാതെ പൗരന്മാര് പകര്ത്തിയ ചിത്രം കോടതിയില് തെളിവായി ഉപയോഗിക്കാനുമാകും. പേര് വെളിപ്പെടുത്താതെ പരാതികള് അറിയിക്കാം.
