മുണ്ടക്കയം: കോരുത്തോട് സ്വദേശി അജ്ഞാത വാഹനം ഇടിച്ചു മരിച്ച സംഭവത്തില് അഞ്ച് മാസത്തിനു ശേഷം അറസ്റ്റ്. ഡിസംബര് 15ന് കോരുത്തോട് സ്വദേശി തങ്കമ്മ (88) വാഹനം ഇടിച്ച് മരിച്ച സംഭവത്തിലാണ് ഹൈദരാബാദ് സ്വദേശി ദിനേശ് റെഡ്ഡി അറസ്റ്റിലായത്. നടന്നുപോകുമ്പോള് തങ്കമ്മയെ വാഹനം ഇടിക്കുകയായിരുന്നു. പനക്കച്ചിറ ആനക്കുളം കവലയുടെ സമീപമായിരുന്നു അപകടം. ചികിത്സയിലിരിക്കെയാണ് മരണം.
ഇടിച്ച വാഹനം ഏതെന്ന് അന്ന് തിരിച്ചറിഞ്ഞിരുന്നില്ല. ശബരിമല സീസണ് ആയതിനാല് ധാരാളം വാഹനങ്ങള് ഒരേസമയം കടന്നു പോയിരുന്നു. അതിനാല് വാഹനത്തിന്റെ നമ്പര് കണ്ടെത്താന് കഴിഞ്ഞില്ല. ഇടുക്കി, കോട്ടയം ജില്ലകളിലെ നൂറോളം സിസിടിവി ദൃശ്യങ്ങള് കേന്ദ്രീകരിച്ചു അതുവഴി കടന്നുപോയ വാഹനങ്ങളുടെ നമ്പരുകള് ശേഖരിച്ചു. ഇടിച്ച സമയം കണക്കാക്കി ചില വാഹനങ്ങളുടെ നമ്പറുകള് വച്ച് പട്ടിക തയാറാക്കി. തുടര്ന്നു നടത്തിയ അന്വേഷണത്തിലാണ് ദിനേശ് റെഡ്ഡി മുണ്ടക്കയം പോലീസിന്റെ പിടിയിലാകുന്നത്. വാടകയ്്ക്കെടുത്ത വാഹനത്തിലാണ് ഹൈദരാബാദ് സ്വദേശികള് തീര്ത്ഥാടനത്തിനെത്തിയത്.
എസ്ഐ മനോജും സിപിഒ ജോസിയും ചേര്ന്ന് ഹൈദരാബാദില് എത്തുകയും വാഹനം ഉടമയെ കണ്ടെത്തുകയും വാഹനം ഉടന് കസ്റ്റഡിയില് എടുക്കുകയും ചെയ്തു.
