സിംഗപ്പൂര്: സിംഗപ്പൂരില് വീണ്ടും കോവിഡ് വ്യാപിക്കുന്നു. മേയ് അഞ്ചിനും 11നും ഇടയില് 25,900 പേര്ക്കാണ് പുതുതായി കോവിഡ് ബാധിച്ചത്. ആരോഗ്യ മന്ത്രി ഓങ് യെ കുന് പൊതുജനങ്ങളോട് മാസ്ക് ധരിക്കാന് നിര്ദേശിച്ചു.
കഴിഞ്ഞാഴ്ച 13,700 കേസുകളാണ് റിപ്പോര്ട്ട് ചെയ്തത്. നിലവില് കൊവിഡ് വ്യാപനത്തിന്റെ പ്രാരംഭ ഘട്ടത്തിലാണെന്നും അടുത്ത രണ്ടോ നാലോ ആഴ്ചയ്ക്കുള്ളില് കൊവിഡ് വ്യാപനം അതിന്റെ മൂര്ധന്യത്തില് എത്തിയേക്കുമെന്നും മുന്നറിയിപ്പ് നല്കി. എന്നിരുന്നാലും, സിംഗപ്പൂരില് ഇപ്പോള് ഏതെങ്കിലും തരത്തിലുള്ള സാമൂഹിക നിയന്ത്രണങ്ങള്ക്കോ മറ്റേതെങ്കിലും നിര്ബന്ധിത നടപടികള്ക്കോ പദ്ധതികളൊന്നുമില്ലെന്ന് ആരോഗ്യമന്ത്രി പറഞ്ഞു.
ആശുപത്രിയില് പ്രവേശിപ്പിക്കുന്നവരുടെയും ഗുരുതരാവസ്ഥയിലുള്ളവരുടെയും എണ്ണത്തില് വര്ധനയുണ്ട്. 250 പേരെയാണ് പുതുതായി ആശുപത്രിയില് പ്രവേശിപ്പിച്ചത്. അടിയന്തരമല്ലാത്ത ശസ്ത്രക്രിയകള് മാറ്റിവെക്കാനും ഗുരുതരാവസ്ഥയില്ലാത്തവരെ വീടുകളിലേക്ക് തിരിച്ചയക്കാനും ആശുപത്രികള്ക്ക് നിര്ദേശം നല്കി.
60 വയസിന് മുകളിലുള്ളവരും മറ്റു ഗുരുതര രോഗങ്ങള് ഉള്ളവരും ജാഗ്രത പാലിക്കണം. കഴിഞ്ഞ 12 മാസത്തിനിടെ കോവിഡ് വാക്സിന് എടുക്കാത്തവര് സുരക്ഷയുടെ ഭാഗമായി അധിക ഡോസ് എടുക്കണമെന്നും സര്ക്കാര് നിര്ദേശം നല്കി.
സ്ഥിതിഗതികള് തുടര്ന്നാല് ആയിരം പേര്ക്ക് ശുപത്രിവാസം വേണ്ടിവരും. ഇത് സിംഗപ്പൂരിലെ ആരോഗ്യമേഖലയ്ക്ക് പ്രതിസന്ധി സൃഷ്ടിച്ചേക്കുമെന്നാണ് റിപ്പോര്ട്ടുകള്.
