ഒരു ലിറ്റര്‍ പെട്രോളില്‍ 25 കിലോമീറ്റര്‍ ഓടുന്ന കാര്‍….ആനന്ദ ലബ്ധിക്ക് ഇനിയെന്ത് വേണം? ഇന്ത്യയില്‍ കൊടിപാറിച്ച് മാരുതിയുടെ ഈ കാര്‍

ഒരു ലിറ്റര്‍ പെട്രോളിന് 25 കിലോമീറ്റര്‍ മൈലേജ് നല്‍കുന്ന കാര്‍ എന്ന ഒരൊറ്റ പരസ്യം മതി ആ കാറിന് വേണ്ടി ജീവിതച്ചെലവ് കുറയ്‌ക്കാന്‍ ശ്രമിക്കുന്ന ഇന്ത്യന്‍ മധ്യവര്‍ഗ്ഗം എത്ര വേണമെങ്കിലും കാത്തിരിക്കും. 11,000 രൂപ ടോക്കൺ തുകയില്‍ ബുക്കിംഗ് ആരംഭിച്ച മാരുതിയ്‌ക്ക് നിലയ്‌ക്കാത്ത ഓര്‍ഡറുകളുടെ പ്രവാഹമാണ്.

പുതിയ തലമുറ 2024 സ്വിഫ്റ്റിലൂടെയാണ് മാരുതി സുസുക്കി ഞെട്ടിക്കാന്‍ പോകുന്നത്. ഇതിന്റെ എക്സ്-ഷോറൂം വില വെറും 6.49 ലക്ഷം രൂപ എന്നതും ആകര്‍ഷണം തന്നെ. പുതിയ Z സീരീസ് എഞ്ചിനാണ് ഈ കാറിന് മികച്ച മൈലേജ് നല്‍കുന്നത്. നാലാം തലമുറ സ്വിഫ്റ്റ് ഡീലർഷിപ്പുകളിൽ എത്തിത്തുടങ്ങി.

LXi, VXi, VXi (O), ZXi, ZXi+, ZXi+ ഡ്യുവൽ ടോൺ എന്നിങ്ങനെ ആറ് വേരിയൻ്റുകള്‍ തെരഞ്ഞെടുക്കാം. അതിന്റെ വിലയെക്കുറിച്ച് പറയുകയാണെങ്കിൽ, 2024 മാരുതി സ്വിഫ്റ്റ് ബേസ് മോഡലായ LXi യുടെ വില 6.49 ലക്ഷം രൂപ. മുൻനിര മോഡലായ ZXi ഡ്യുവൽ ടോണിന് 9.64 ലക്ഷം രൂപ വരെയാണ് എക്സ്-ഷോറൂം വില. അങ്ങേയറ്റം മത്സരം മുറുകുന്ന ഹാച്ച് ബാക്ക് വിപണിയില്‍ പിടിമുറുക്കകയാണ് സ്വിഫ്റ്റിന്റെ നാലാം തലമുറക്കാറായ സ്വിഫ്റ്റ് 2024ലൂടെ മാരുതി ശ്രമിക്കുന്നത്.

പുതിയ Z സീരീസ് എഞ്ചിൻ പഴയ സ്വിഫ്റ്റിനെ അപേക്ഷിച്ച് മൈലേജ് ഗണ്യമായി വർദ്ധിപ്പിക്കുന്നു. ഇതിൽ കണ്ടെത്തിയ പുതിയ 1.2L Z12E 3-സിലിണ്ടർ NA പെട്രോൾ എഞ്ചിൻ 80bhp കരുത്തും 112nm torque ഉം സൃഷ്ടിക്കാൻ പ്രാപ്തമാണ്. 5-സ്പീഡ് മാനുവൽ, 5-സ്പീഡ് AMT ഗിയർബോക്‌സ് ഓപ്ഷനുകളുണ്ട്.

തികച്ചും പുതിയൊരു ഇൻ്റീരിയർ ഇതിൽ കാണാം. അതിന്റെ ക്യാബിൻ തികച്ചും ആഡംബരമാണ്. പിന്നിൽ എസി വെൻ്റുകൾ ഇതിൽ ലഭ്യമാണ്. വയർലെസ് ചാർജറും ഡ്യുവൽ ചാർജിംഗ് പോർട്ടുകളും ഈ കാറിൽ ലഭ്യമാകും. ഇതിൽ റിയർ വ്യൂ ക്യാമറ ഉണ്ടായിരിക്കും. അതിനാൽ ഡ്രൈവർക്ക് കാർ എളുപ്പത്തിൽ പാർക്ക് ചെയ്യാം.

പുതുതായി രൂപകല്പന ചെയ്‍ത ഡാഷ്ബോർഡ് ഇതിൽ ലഭ്യമാണ്. വയർലെസ് കണക്റ്റിവിറ്റിയുള്ള ആൻഡ്രോയിഡ് ഓട്ടോ, ആപ്പിൾ കാർപ്ലേ എന്നിവയെ ഈ സ്‌ക്രീൻ പിന്തുണയ്‌ക്കുന്നു.

ഹിൽ ഹോൾഡ് കൺട്രോൾ, ഇഎസ്പി (ഇലക്‌ട്രോണിക് സ്റ്റെബിലിറ്റി പ്രോഗ്രാം-ഇഎസ്പി), പുതിയ സസ്പെൻഷൻ, എല്ലാ വേരിയൻ്റുകൾക്കും ആറ് എയർബാഗുകൾ എന്നിവ ഉള്‍പ്പെടെ മികച്ച സുരക്ഷ ഉറപ്പാക്കിയിട്ടുണ്ട്. ക്രൂയിസ് കൺട്രോൾ, എല്ലാ സീറ്റുകൾക്കും 3-പോയിൻ്റ് സീറ്റ്ബെൽറ്റുകൾ, ആൻ്റി-ലോക്ക് ബ്രേക്കിംഗ് സിസ്റ്റം, ഇലക്ട്രോണിക് ബ്രേക്ക്ഫോഴ്സ് ഡിസ്ട്രിബ്യൂഷൻ (ഇബിഡി), ബ്രേക്ക് അസിസ്റ്റ് (ബിഎ) തുടങ്ങിയ അതിശയിപ്പിക്കുന്ന സുരക്ഷാ ഫീച്ചറുകൾ ഇതിലുണ്ട്.