കണ്ണൂര്‍: ലൈംഗിക വിദ്യാഭ്യാസം പാഠ്യ പദ്ധതിയിലേക്ക്. അടുത്ത അധ്യയന വര്‍ഷം 7, 9 ക്ലാസുകളിലെ മാറിവരുന്ന ജീവശാസ്ത്ര പുസ്തകങ്ങളിലാണ് ഇതുമായി ബന്ധപ്പെട്ട
ഭാഗങ്ങള്‍ ഉള്‍പ്പെടുത്തുക. ലൈംഗിക വിദ്യാഭ്യാസം പാഠ്യ പദ്ധതിയില്‍ ഉള്‍പ്പെടുത്താന്‍ വൈകുന്നതില്‍ കഴിഞ്ഞവര്‍ഷം മേയില്‍ ഹൈക്കോടതി കടുത്ത അതൃപ്തി പ്രകടിപ്പിച്ചിരു
ന്നു.
കൗമാരപ്രായത്തിലെ ശാരീരിക മാറ്റങ്ങളും മറ്റും പ്രാഥമികമായി പരിചയപ്പെടുത്തുന്ന അധ്യായമാണ് ഏഴാം ക്ലാസിലെ ജീവശാസ്ത്ര പാഠപുസ്തകം രണ്ടാം ഭാഗത്തില്‍ ഉണ്ടാവുക. ഒന്‍പതാം ക്ലാസിലെ ജീവശാസ്ത്ര പാഠപുസ്തകത്തിന്റെ രണ്ടാം ഭാഗത്തിലെ ‘പ്രത്യുത്പാദന ആരോഗ്യം’ എന്ന അധ്യായത്തില്‍ വിശദമായി വിഷയം പഠിപ്പിക്കും.
കൗമാരകാലത്ത് ഉണ്ടാകുന്ന ഹോര്‍മോണ്‍ വ്യതിയാനങ്ങള്‍, ആര്‍ത്തവകാല ശുചിത്വം, ഗര്‍ഭധാരണം എങ്ങനെ, ഭ്രൂണവളര്‍ച്ച, ഗര്‍ഭ നിരോധന മാര്‍ഗങ്ങള്‍, പ്രസവ പ്രക്രിയ, ഗര്‍ഭഛിദ്രം, ഗര്‍ഭച്ഛിദ്രത്തിന്റെ അപകട സാധ്യതകള്‍ തുടങ്ങിയവ പഠിപ്പിക്കും. ലൈംഗിക അതിക്രമത്തിന് ഇരയായാല്‍ എന്ത് ചെയ്യണം, ആരെ സമീപിക്കണം തുടങ്ങിയ അറിവുകളും ദിശ ഹെല്‍പ്‌ലൈന്‍ നമ്പറും പാഠഭാഗത്തിലുണ്ട്.
സിലബസ് തയ്യാറാക്കുന്നതിന്റെ മുന്നോടിയായി എസ്‌സി ഇആര്‍ടി വിദ്യാര്‍ഥികള്‍ക്ക് ഇടയില്‍ സര്‍വേ നടത്തി ലൈംഗികത സംബന്ധിച്ച അറിവുകള്‍ എത്രത്തോളമെന്ന് പഠിച്ചിരുന്നു.
അടുത്ത ദിവസം മുതല്‍ തുടങ്ങുന്ന അധ്യാപക പരിശീലനത്തില്‍ കൗമാരക്കാര്‍ക്ക് ഇടയിലെ ശാരീരിക, മാനസിക പ്രശ്‌നങ്ങളെ അഭിമുഖീകരിക്കാന്‍ ആവശ്യമായ മൊഡ്യൂളുകള്‍ ഉള്‍പ്പെടുത്തിയിട്ടുണ്ട്.
പ്രതികരിക്കാൻ ഇവിടെ എഴുതുക: