” ഹബീബി വെൽകം ടു ദുബായ് ” , സ്വപ്ന നഗരിയിലേക്ക് വിദേശ സന്ദർശകരുടെ കുത്തൊഴുക്ക് തുടരുന്നു ; ദുബായ് വേറെ ലെവൽ…

ദുബായ് : ഈ വർഷത്തെ ആദ്യ പാദത്തിൽ 5.18 ദശലക്ഷം വിദേശ സന്ദർശകർ ഒന്നിലധികം ദിവസത്തെ സന്ദർശനത്തിനായി ദുബായിലെത്തിയതായി കണക്കുകൾ സൂചിപ്പിക്കുന്നു. എമിറേറ്റ്സ് ന്യൂസ് ഏജൻസി ഇക്കാര്യം റിപ്പോർട്ട് ചെയ്തത്.

2024 ജനുവരി മുതൽ മാർച്ച് വരെയുള്ള കണക്കുകൾ പ്രകാരമാണിത്. കഴിഞ്ഞ വർഷത്തെ ഇതേ കാലയളവിലെ സന്ദർശകരുടെ എണ്ണവുമായി താരതമ്യം ചെയ്യുമ്പോൾ 11 ശതമാനം വളർച്ച രേഖപ്പെടുത്തിയിട്ടുണ്ട്. കഴിഞ്ഞ ദിവസം ആരംഭിച്ച മുപ്പത്തൊന്നാമത് അറേബ്യൻ ട്രാവൽ മാർക്കറ്റ് പ്രദർശനത്തിൽ വെച്ചാണ് ദുബായ് ഡിപ്പാർട്മെന്റ് ഓഫ് ഇക്കോണമി ആൻഡ് ടൂറിസം ഈ കണക്കുകൾ പ്രസിദ്ധീകരിച്ചത്.

ഈ വർഷത്തിന്റെ ആദ്യ പാദത്തിലെ സന്ദർശകരുടെ കണക്കുകൾ ടൂറിസം മേഖലയിലെ റെക്കോർഡ് നേട്ടത്തിലേക്കാണ് ദുബായ് സഞ്ചരിക്കുന്നതെന്ന് കൃത്യമായി ചൂണ്ടിക്കാട്ടുന്നു.

ടൂറിസം ഉൾപ്പടെയുള്ള എല്ലാ പ്രധാനമേഖലകളിലും എമിറേറ്റിനെ ഏറ്റവും മുൻപന്തിയിൽ എത്തിക്കുന്നതിനുള്ള ദുബായ് ഭരണാധികാരിയുടെ ദർശനങ്ങളെ സാധൂകരിക്കുന്നതാണ് ഈ നേട്ടമെന്ന് ദുബായ് കിരീടാവകാശി ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം അറിയിച്ചു.

ടൂറിസത്തിന് മുതൽകൂട്ടായി മുപ്പത്തൊന്നാമത് അറേബ്യൻ ട്രാവൽ മാർക്കറ്റ് എക്സിബിഷൻ 

അറേബ്യൻ ട്രാവൽ മാർക്കറ്റ് എക്സിബിഷൻ മെയ് 6-ന് ദുബായിൽ ആരംഭിച്ചു. മേഖലയിലെ ഏറ്റവും പ്രധാനപ്പെട്ട ട്രാവൽ ആൻഡ് ടൂറിസം എക്സിബിഷനാണ് അറേബ്യൻ ട്രാവൽ മാർക്കറ്റ്.

ദുബായ് സിവിൽ ഏവിയേഷൻ അതോറിറ്റി പ്രസിഡന്റും, ദുബായ് എയർപോർട്സ് ചെയർമാനും, എമിറേറ്റ്സ് എയർലൈൻ ആൻഡ് ഗ്രൂപ്പ് ചീഫ് എക്സിക്യൂട്ടീവുമായ ഷെയ്ഖ് അഹ്മദ് ബിൻ സയീദ് അൽ മക്തൂമാണ് മുപ്പത്തൊന്നാമത് അറേബ്യൻ ട്രാവൽ മാർക്കറ്റ് ഉദ്ഘാടനം ചെയ്തത്.

മുപ്പത്തൊന്നാമത് അറേബ്യൻ ട്രാവൽ മാർക്കറ്റ് എക്സിബിഷൻ മെയ് 9 വരെ നീണ്ട് നിൽക്കും. ദുബായ് വേൾഡ് ട്രേഡ് സെന്ററിൽ വെച്ചാണ് ഈ ട്രാവൽ ആൻഡ് ടൂറിസം പ്രദർശനം സംഘടിപ്പിക്കുന്നത്.

165 രാജ്യങ്ങളിൽ നിന്നുള്ള രണ്ടായിരത്തിമുന്നൂറോളം പ്രദർശകർ ഇത്തവണത്തെ എക്‌സിബിഷനിൽ പങ്കെടുക്കുന്നുണ്ട്. അറേബ്യൻ ട്രാവൽ മാർക്കറ്റ് എക്സിബിഷൻ ചരിത്രത്തിലെ ഏറ്റവും വലിയ പ്രദർശനമാണ് ഈ വർഷം സംഘടിപ്പിക്കുന്നത്.