പാലക്കാട് : വൈദ്യുതി ഉപഭോഗം വര്ദ്ധിച്ചതോടെ മേഖല തിരിച്ചുള്ള വൈദ്യുതി നിയന്ത്രണം കെഎസ്ഇബി തുടങ്ങി. ഉപഭോഗം കൂടിയ ഇടങ്ങളിലാണ് നിയന്ത്രണം. പാലക്കാട് ട്രാന്സ്മിഷന് സര്ക്കിളിന് കീഴിലുള്ള പ്രദേശങ്ങളിലാണ് ആദ്യഘട്ടത്തില് നിയന്ത്രണം. രാത്രി ഏഴിനും അര്ധരാത്രി ഒരു മണിക്കുമിടയിലാണ് നിയന്ത്രണം.
ഇടവിട്ട് വൈദ്യുതി നിയന്ത്രണത്തിനാണ് സാധ്യത. മണ്ണാര്ക്കാട്, അലനല്ലൂര്, കൊപ്പം, ഷൊര്ണൂര്, ഒറ്റപ്പാലം, ആറങ്ങോട്ടുര, പട്ടാമ്പി, കൂറ്റനാട്, പത്തിരിപ്പാല, കൊല്ലങ്കോട്, ചിറ്റൂര്, വടക്കഞ്ചേരി, കൊടുവായൂര്, നെന്മാറ,ഒലവക്കോട് സബ്സ്റ്റേഷനുകളിലാണ് നിയന്ത്രണം.
അതിനിടെ, സംസ്ഥാനത്ത് താപനില വര്ദ്ധിച്ചത് മൂലം വൈദ്യുതി ഉപഭോഗം കൂടിയത് നിയന്ത്രിക്കാന് കെഎസ്ഇബി മാര്ഗ നിര്ദേശം പുറത്തിറക്കി . രാത്രി പത്ത് മുതല് പുലര്ച്ചെ രണ്ട് മണി വരെയാണ് വൈദ്യുതി ക്രമീകരണം. രാത്രി 9 കഴിഞ്ഞാല് അലങ്കാര ദീപങ്ങളും പരസ്യ ബോര്ഡുകളും പ്രവര്ത്തിപ്പിക്കരുത്. വീടുകളില് എസി 26 ഡിഗ്രിക്ക് മുന്നില് ക്രമീകരിക്കണം. രണ്ട് ദിവസത്തെ സ്ഥിതി വിലയിരുത്തി വീണ്ടും കെഎസ്ഇബി സര്ക്കാരിന് റിപ്പോര്ട്ട് നല്കും. ജല വിതരണത്തെ ബാധിക്കാതെ വാട്ടര് അതോറിറ്റി പമ്പിംഗ് ക്രമീകരിക്കണം . ലിഫ്റ്റ് ഇറിഗേഷന് പമ്പുകള് പീക്ക് സമയത്ത് ഉപയോഗിക്കരുതെന്നും വാട്ടര് അതോരിറ്റിക്ക് നിര്ദ്ദേശമുണ്ട്.
