കൊച്ചി: പനമ്പള്ളിനഗറിലെ വിദ്യാനഗര്‍ റോഡില്‍ നവജാത ശിശുവിന്റെ മൃതദേഹം നടുറോഡില്‍ കണ്ടെത്തി. സമീപത്തുള്ള ഫ്‌ളാറ്റില്‍നിന്ന് കുഞ്ഞിനെ ഒരു കവറിലാക്കി വലിച്ചെറിയുന്ന ദൃശ്യങ്ങള്‍ സിസിടിവിസില്‍ പതിഞ്ഞു. ജനിച്ച് ദിവസങ്ങള്‍ മാത്രമായ ആണ്‍കുഞ്ഞിന്റെ മൃതദേഹമാണ് കണ്ടെത്തിയതെന്ന് പോലീസ് അറിയിച്ചു.
സമീപത്തുള്ള ഫ്‌ളാറ്റില്‍നിന്ന് ഒരു പൊതി റോഡിലേക്കു വന്നു വീഴുന്നതാണു സിസിടിവി ദൃശ്യങ്ങളിലുള്ളത്. രാവിലെ എട്ടേകാലോടെയാണു സംഭവം. റോഡില്‍ എന്തോ വീണ് കിടക്കുന്നത് ശ്രദ്ധയില്‍പ്പെട്ട് അടുത്ത് എത്തിയവര്‍ കണ്ടത് ചോരയില്‍ കുളിച്ചു കിടക്കുന്ന കുഞ്ഞിനെയാണ്. തുടര്‍ന്ന് പോലീസിനെ വിവരം അറിയിച്ചു. ഉദ്യോഗസ്ഥര്‍ സ്ഥലത്തെത്തി ഇന്‍ക്വസ്റ്റ് നടപടികള്‍ തുടരുകയാണ്. ആരാണ് കുഞ്ഞിനെ റോഡിലേക്ക് വലിച്ചെറിഞ്ഞത് എന്നത് കണ്ടെത്താനാണ് പോലീസ് ശ്രമം.
21 ഫ്‌ലാറ്റുകളുള്ള സമുച്ചയത്തില്‍ നിന്നാണ് കുഞ്ഞിനെ വലിച്ചെറിയുന്ന ദൃശ്യങ്ങള്‍ കിട്ടിയത്. ഇതില്‍ മൂന്നെണ്ണം ഒഴിഞ്ഞു കിടക്കുകയാണ്. അവിടെ താമസക്കാരൊന്നും ഇല്ലായിരുന്നു എന്നാണ് സമീപത്തുള്ളവര്‍ പറയുന്നത്. ആരെങ്കിലും അവിടേക്ക് ഈ ദിവസങ്ങളില്‍ വന്നിട്ടുണ്ടോ എന്നും ജോലിക്കാര്‍ ആരെങ്കിലും അവിടെ ഉണ്ടായിരുന്നോ എന്നും പോലീസ് അന്വേഷിച്ചുവരുകയാണ്. ഇവിടെ ഗര്‍ഭിണികളായി ആരും ഉണ്ടായിരുന്നതായി അറിയില്ലെന്നാണ് പ്രഥാമിക വിവരം.
പ്രതികരിക്കാൻ ഇവിടെ എഴുതുക: